మార్క్​ఫెడ్​ ద్వారా పొగాకు కొనుగోలుపై నెల్లూరు జిల్లా రైతుల హర్షం

గిట్టుబాటు ధర లభించక తీవ్ర ఇబ్బందులు పడుతున్న పొగాకు రైతులకు ప్రభుత్వం తీపి కబురు అందించింది. పొగాకు వేలం కేంద్రంలో ప్రభుత్వమే మార్క్​ఫెడ్​ ద్వారా కొనుగోలు చేయడం వల్ల మంచి ధర లభిస్తుందంటూ రైతులు ఆనందం వ్యక్తం చేస్తున్నారు.

నెల్లూరు జిల్లాలోని మర్రిపాడు, ఉదయగిరి, కలిగిరి, వింజమూరు తదితర మండలాల్లో రైతులు అధిక విస్తీర్ణంలో పొగాకు సాగు చేస్తుంటారు. ఓ సంవత్సరం మంచి ధరలు పలికినా... మరో ఏట ధరలు లేక రైతులు తీవ్ర ఇబ్బందులు పడుతూ నష్టాల పాలవుతున్నారు. ఈ పరిస్థితులను గుర్తించి మార్క్​ఫెడ్​ ద్వారా ప్రభుత్వమే కొనుగోలు చేయాలని నిర్ణయించింది. జిల్లాలోని డీసీ పల్లి, కలిగిరి కేంద్రాల్లో కొనుగోలు ప్రారంభించారు. మేలి రకం పొగాకును​ కిలో రూ. 201కు కొనుగోలు చేయడం వల్ల నెల్లూరు జిల్లా పొగాకు రైతులు ఆనందం వ్యక్తం చేస్తున్నారు. ఇటువంటి ధరకు పొగాకు కొనుగోలు కేంద్రంలో వ్యాపారులు కొనుగోలు చేయలేదని, ప్రభుత్వమే కొనుగోలు చేయడం సంతోషంగా ఉందని రైతులు తెలిపారు.

ఈ విషయంపై డీసీ పల్లి పొగాకు వేలం నిర్వహణాధికారి దేవానంద హర్షం వ్యక్తం చేశారు. రైతులు ఇంకా నాణ్యమైన పొగాకు తీసుకొస్తే ఇంకా మంచి రేట్లు వస్తాయన్నారు.

ఇదీ చదవండి :డీసీ పల్లి పొగాకు కేంద్రంలో మార్క్ ఫెడ్ ద్వారా కొనుగోళ్లు ప్రారంభం