రైలొస్తోందని గేట్లు పడ్డాయి.. అటువైపు ఓ 10 మంది.. ఇటువైపు మరో 10 మంది వాహనదారులు, పాదచారులు నిలిచి ఉన్నారు. ఇంతలో ఓ వ్యక్తి హడావుడిగా ముందుకు పరిగెత్తాడు. ‘ఓయ్‌.. బాబు.. రైలొస్తోంది.. ఆగు.’ అంటూ అక్కడున్న వారందరూ కేకలు వేశారు. అప్పటికే రైలు ఆయన్ను ఢీకొని ప్రాణాలు ఎగరేసుకుపోయింది. రైలు వెళ్లాక చూస్తే మృతదేహం కూడా కనిపించలేదు. అసలేం జరిగిందో.. మృతదేహం ఏమైందో ఎవరికీ అంతుచిక్కలేదు. చివరకు 13 కి.మీ.లు రైలు వెళ్లాక వెంకటాచలం రైల్వే స్టేషన్‌లో గుర్తించి స్వాధీనం చేసుకున్నారు. ఈ ప్రమాదం బుధవారం రాత్రి నెల్లూరు జిల్లా కొండాయపాలెం గేట్‌ ప్రాంతంలో జరిగింది.
హత్యా..?ఆత్మహత్యా..?
గూడ్సు రైలు చెన్నై వైపు వెళ్తుండగా కొండాయపాలెం గేట్‌ ప్రాంతంలో ఓ వ్యక్తి రైలు ఢీకొని మృతిచెందాడు. అయితే ఇది ఆత్మహత్యా, ప్రమాదవశాత్తు జరిగిందో ఎవరికీ తెలియడం లేదు. రైల్వే అధికారులు కూడా ధ్రువీకరించడం లేదు. మృతదేహం కనిపించకపోవడంతో గేట్‌మెన్‌ వేదాయపాలెం స్టేషన్ సిబ్బందికి సమాచారం అందించారు. అప్పటికే రైలు స్టేషన్ దాటి వెళ్లిపోయింది. దాంతో వెంకటాచలం సిబ్బందికి సమాచారం అందించారు. రైలును ఆపి పరిశీలించగా ఇంజిన్ ముందు భాగంలోనే మృతదేహం వేలాడుతూ కనిపించింది. రైల్వే పోలీసులు సంఘటనా స్థలానికి చేరుకొని మృతదేహాన్ని కిందకు దించారు. మృతుడి వద్ద ఎలాంటి ఆధారాలు లభించలేదు. మరణానంతర పరీక్షల నిమిత్తం మృతదేహాన్ని జిల్లా ప్రభుత్వాస్పత్రికి తరలించారు. రైల్వే పోలీసులు కేసు నమోదు చేసి దర్యాప్తు చేస్తున్నారు.
ఇదీ చదవండి:
బురేవి ప్రభావం.. నెల్లూరు, చిత్తూరు, విశాఖ జిల్లాల్లో భారీ వర్షాలు
