Prasanna Kumar Reddy: తెదేపా అధినేత, మాజీ ముఖ్యమంత్రి నారా చంద్రబాబునాయుడికి నెల్లూరు జిల్లా కోవూరు శాసనసభ్యుడు నల్లపరెడ్డి ప్రసన్నకుమార్‌రెడ్డి ఆదివారం అభినందనలు తెలిపారు. ఇదే సందర్భంలో అదే వేదికపై ఉన్న ఉప ముఖ్యమంత్రి నారాయణస్వామి మాత్రం చంద్రబాబుపై తీవ్ర విమర్శలు చేశారు. ఒకే వేదికపై మంత్రి, వైకాపా ఎమ్మెల్యే పరస్పర విరుద్ధంగా మాట్లాడటం చర్చనీయాంశమైంది. సంగం మండలం జంగాలకండ్రిక గ్రామంలో వైకాపా అభ్యర్థి మేకపాటి విక్రమ్‌రెడ్డితో కలసి వారు ఎన్నికల ప్రచారం నిర్వహించారు.
రోడ్‌షోలో తొలుత ఎమ్మెల్యే ప్రసన్నకుమార్‌రెడ్డి మాట్లాడుతూ ఒక శాసనసభ్యుడు పదవీకాలం మధ్యలో మృతి చెంది ఉప ఎన్నికల్లో ఆ కుటుంబసభ్యులు పోటీ చేస్తే, అక్కడ పోటీ పెట్టకూడదని తెలుగుదేశం ఒక నియమం పెట్టుకుని అమలు చేస్తోందన్నారు. దీనికి తెదేపా అధినేత చంద్రబాబునాయుడికి అభినందనలు తెలుపుతున్నట్లు ప్రసన్న పేర్కొన్నారు. మేకపాటి గౌతమ్‌రెడ్డి మృతి చెందినప్పుడు భాజపా నాయకులు సానుభూతి తెలిపి, ప్రస్తుతం పోటీ చేయడం దారుణమన్నారు. ఆ తరువాత ఉపముఖ్యమంత్రి నారాయణస్వామి మాట్లాడుతూ తెదేపా అధినేత చంద్రబాబునాయుడి గురించి ఎమ్మెల్యే ప్రసన్నకుమార్‌రెడ్డి చెప్పిన విషయాన్ని తాను అంగీకరించడం లేదని స్పష్టం చేశారు.