'ఆక్రమణదారులను వదిలేసి మా గుడిసెలు తొలగించడం దారుణం '

రియల్ ఎస్టేట్ వ్యాపారులు ప్రభుత్వ భూమి ఆక్రమించినా పట్టించుకోని అధికారులు... తమ గుడిసెలు తొలగించమనటం దారుణమని నెల్లూర జిల్లా కాకుపల్లి గ్రామస్థులు ఆవేదన వ్యక్తం చేశారు. రియల్ ఎస్టేట్ వ్యాపారులు ఆక్రమించిన స్థలంలోనే తమకు ఇళ్ల స్థలాలు కేటాయించాలని డిమాండ్ చేశారు.

రియల్ ఎస్టేట్ వ్యాపారులు ఆక్రమించుకున్న ప్రభుత్వ స్థలంలోనే తమకు ఇళ్ల స్థలాలు కేటాయించాలని.. నెల్లూరు జిల్లా కాకుపల్లిలో గ్రామస్థులు ఆందోళనకు దిగారు. కాకుపల్లి బిట్-1 ప్రాంతంలో ముత్తుకూరు కాలువ పక్కనే ఉన్న ఇరిగేషన్ స్థలంలో ఇటీవల రియల్ ఎస్టేట్ వ్యాపారులు గోడ నిర్మించారు. దీంతో ఆగ్రహించిన ప్రజలు.. ఎన్నో ఏళ్లుగా తాము వినియోగించుకుంటున్న ప్రభుత్వ భూమిలో రియల్ ఎస్టేట్ వ్యాపారులు గోడ ఎలా కడతారంటూ నిరసన వ్యక్తం చేశారు.

ఆ స్థలంలోనే గుడిసెలు వేసి.. తమకు అక్కడే ఇళ్ల స్థలాలు ఇవ్వాలని డిమాండ్ చేశారు. సమాచారం అందుకున్న ఎమ్మార్వో నాజర్, సంఘటనా స్థలానికి చేరుకొని గ్రామస్థులతో మాట్లాడారు. ఇరిగేషన్ స్థలంలో ఎవరికీ ఇళ్ల స్థలాలు ఇవ్వకూడదనీ... రియల్ ఎస్టేట్ వ్యాపారులు నిర్మించిన గోడను తొలగిస్తామని హామీ ఇచ్చారు.

బడాబాబులు బహిరంగంగా ప్రభుత్వ స్థలాన్ని ఆక్రమించినా పట్టించుకోని అధికారులు... తమ గుడిసెలు మాత్రం తొలగించాలని చెప్పటం దారుణమని గ్రామస్థులు ఆవేదన వ్యక్తం చేశారు. తమకు న్యాయం జరిగేంత వరకు అక్కడ నుంచి కదిలేది లేదని స్పష్టం చేశారు.

ఇదీ చదవండి:'ఇదేమి నియంత రాజ్యం కాదు... ప్రజాస్వామ్యమని గుర్తుంచుకోండి'