Shree Talpagiri Ranganatha Swami Rathotsavam : నెల్లూరు శ్రీ తల్పగిరి రంగనాథ స్వామి రథోత్సవం అంగరంగ వైభవంగా సాగింది. రంగనాథ స్వామి రథోత్సవాన్ని నెల్లూరు గ్రామీణ శాసనసభ్యులు కోటంరెడ్డి శ్రీధర్ రెడ్డి ప్రారంభించారు. స్వామి వారి బ్రహ్మోత్సవాల్లో భాగంగా బుధవారం రాత్రి స్వామి వారి కళ్యాణం వేడుకగా జరిగింది.
వేలాదిగా తరలివచ్చిన భక్తులు..: కళ్యాణమూర్తి అయిన శ్రీదేవి, భూదేవి సమేత రంగనాథ స్వామి పట్టు వస్త్రాలు సర్వాభరణాలతో సుందరంగా ముస్తాబై, భారీ రథంపై రంగనాయకులపేట పురవీధుల్లో విహరించారు. ఆలయం వద్దన్న చిత్రకూటం నుంచి నాలుగుకాళ్ల మండపం వరకు రథోత్సవం సాగింది. వేలాదిగా తరలివచ్చిన భక్తులు అడుగడుగునా స్వామివారికి హారతులిస్తూ, రథంపై ఉప్పు మిరియాలు చల్లుతూ, టెంకాయలు కొట్టి మొక్కలు తీర్చుకున్నారు.
సాంప్రదాయబద్ధంగా ఎదురుకోలు ఉత్సవం..: నాలుగుకాళ్ల మండపం వద్దకు రథం చేరగానే, అప్పటికే అక్కడ వేచి ఉన్న నరసింహకొండ నరసింహస్వామి రంగనాథ స్వామికి పట్టు వస్త్రాలు సమర్పించారు. అనంతరం సాంప్రదాయబద్ధంగా ఎదురుకోలు ఉత్సవం కోలాహలంగా నిర్వహించారు. ఈ సందర్భంగా పలువురు దాతలు పెద్ద ఎత్తున అన్నదానం కార్యక్రమాలు, ప్రసాదాలు, శీతల పానియాలను భక్తులకు పంపిణీ చేశారు.
ప్రతిష్టాత్మకంగా నిర్వహించడం గర్వకారణం..: ``నెల్లూరు నగరంలోని శ్రీ తల్పగిరి రంగనాథ స్వామి రథోత్సవాన్ని ప్రతిష్టాత్మకంగా నిర్వహించడం గర్వకారణంగా ఉంది’’ అని ఈ సందర్భంగా నెల్లూరు గ్రామీణ శాసనసభ్యులు కోటంరెడ్డి శ్రీధర్ రెడ్డి సంతోషం వ్యక్తం చేశారు. ఆయన మాట్లాడుతూ ``నెల్లూరు నగరంలోని శ్రీ తల్పగిరి రంగనాథ స్వామి రథోత్సవాన్ని ప్రతిష్టాత్మకంగా నిర్వహించడం గర్వకారణంగా ఉంది. నెల్లూరు జిల్లాకే ప్రసిద్ధి చెందిన శ్రీ తల్పగిరి రంగనాథ స్వామి మహోత్సవాలు వైభవంగా నిర్వహిస్తున్నారు. శ్రీ రంగనాధ భక్త మండలి, రాజరాజేశ్వరీ భక్త మండలుల ఆధ్వర్యంలో జరుగుతున్నాయి. శ్రీ తల్పగిరి రంగనాథ స్వామి, రాజరాజేశ్వరీ అమ్మవార్ల ఊరేగింపు భక్తులకు వేడుకగా ఉంటుందన్నారు.