పోలేపల్లిలో యువగళం జైత్రయాత్ర విజయోత్సవ సభ - హాజరుకానున్న చంద్రబాబు, పవన్ కల్యాణ్

Yuvagalam Jaitrayatra Vijayotsava Sabha Update: తెలుగుదేశం పార్టీ యువనేత నారా లోకేశ్ చేపట్టిన యువగళం పాదయాత్రకు సంబంధించి ఆ పార్టీ నేతలు కీలక విషయాన్ని వెల్లడించారు. యువగళం జైత్రయాత్ర విజయోత్సవ సభను ఈనెల 20వ తేదీన నిర్వహిస్తున్నట్లు పేర్కొన్నారు.

Yuvagalam Jaitrayatra Vijayotsava Sabha Update:తెలుగుదేశం పార్టీ జాతీయ ప్రధాన కార్యదర్శి నారా లోకేశ్ చేపట్టిన 'యువగళం' పాదయాత్ర నేటితో 3 వేల కిలోమీటర్లు పూర్తి చేసుకుంది. ఈ సందర్భంగా లోకేశ్ కాకినాడ జిల్లా తుని మండలం రాజులకొత్తూరు వద్ద పైలాన్ ఆవిష్కరించారు. దీంతో పార్టీ కేంద్ర కార్యాలయం ఎన్టీఆర్ భవన్‌లో పార్టీ ముఖ్య నేతలు, శ్రేణులు పెద్ద ఎత్తున కేకులు కట్ చేశారు. అనంతరం యువగళం జైత్రయాత్ర విజయోత్సవ సభకు సంబంధించి పలు కీలక విషయాలను వెల్లడించారు.

Achchennaidu on Yuvagalam Vijayotsava Sabha:ఈ నెల 20వ తేదీన యువగళం జైత్రయాత్ర విజయోత్సవ సభను నిర్వహించబోతున్నామని తెలుగుదేశం పార్టీ రాష్ట్ర అధ్యక్షులు అచ్చెన్నాయుడు తెలిపారు. విజయనగరం జిల్లా భోగాపురం సమీప పోలేపల్లిలో విజయోత్సవ సభ జరుగుతుందని పేర్కొన్నారు. ఈ విజయోత్సవ సభకు తమ పార్టీ అధినేత చంద్రబాబు నాయుడు, జనసేన అధినేత పవన్‌ కల్యాణ్‌‌, ఎమ్మెల్యే బాలకృష్ణ హాజరవుతారని వివరించారు. పొత్తు ప్రకటన తర్వాత తొలిసారిగా ఒకే వేదికపైకి చంద్రబాబు, పవన్, బాలకృష్ణ హాజరుకానుండడంతో ఇరుపార్టీల నేతలతోపాటు ప్రజలు ఆనందాన్ని వ్యక్తం చేస్తున్నారన్నారు. రాష్ట్ర నలుమూలల నుంచి లక్షలాది మంది ప్రజలు, యువత హాజరవుతారని అచ్చెన్నాయుడు వెల్లడించారు.

Achchennaidu Comments: ''విజయనగరం జిల్లా భోగాపురం మండలం పోలేపల్లి వద్ద భూమాత లేఅవుట్‌లో ఈ నెల 20న నారా లోకేశ్ యువగళం పాదయాత్ర ముగింపు సభ నిర్వహిస్తాం. ఈ సభ ద్వారా 2024 ఎన్నికల శంఖారావాన్ని పూరిస్తాం. భూమాత లేఅవుట్‌లో సంప్రదాయబద్దంగా ఈరోజు భూమిపూజ నిర్వహించాం. లోకేశ్ యువగళం పాదయాత్ర ముగింపు సభకు దాదాపు 5 లక్షలు మంది వస్తారని అంచనా వేస్తున్నాం. ఇప్పటికే 10 రైళ్లను బుక్ చేసుకున్నారు. ఈ సభకు నారా చంద్రబాబు నాయుడు, జనసేన పార్టీ అధ్యక్షులు పవన్ కల్యాణ్, బాలకృష్ణ, మరికొంతమంది ప్రధాన నాయకులు హాజరవుతారు. రానున్న ఎన్నికల్లో జనసేన, టీడీపీ నేతలు కలిసికట్టుగా పనిచేస్తాం. వైసీపీ ప్రభుత్వం వెంటిలేటర్‌పై ఉంది. రాబోయేది టీడీపీ, జనసేన ప్రభుత్వమే.'' అని అచ్చెన్నాయుడు అన్నారు.

14 Special Committees Appointment: యువగళం జైత్రయాత్ర విజయోత్సవ సభ నిర్వహణకు సంబంధించి 14 ప్రత్యేక కమిటీలను నియమించారు. అందులో ప్రధానంగా సలహా కమిటీ, సమన్వయ కమిటీ, మీడియా, సభా ప్రాంగణ, ఫుడ్&వాటర్, వసతి, పార్కింగ్, వేదిక నిర్వహణ, వాలంటీర్స్ కోఆర్డినేషన్, రవాణా, ఆర్థిక వనరులు, మెటీరియల్, విశాఖ బ్రాండింగ్, మాస్టర్ ఆఫ్ సెర్మనీ కమిటీలను నియమించారు. ఆ కమిటీల్లో తెలుగుదేశం పార్టీ ముఖ్య నేతలు అచ్చెన్నాయుడు, యనమల రామకృష్ణుడు, అశోక్ గజపతిరాజు, సోమిరెడ్డి చంద్రశేఖర్ రెడ్డి, గోరంట్ల బుచ్చయ చౌదరి, రామానాయుడు, అయ్యన్న పాత్రుడు, గంటా, ప్రత్తిపాటి, దేవినేని ఉమ, అనగాని, ఆలపాటి, బండారు సత్యనారాయణ తదితరులు పర్యవేక్షించనున్నారు.

''ఒక్క అవకాశం అని చెప్పి, అధికారం చేపట్టాక వైఎస్ జగన్ ప్రజలు, యువత, నిరుద్యోగులను దారుణంగా మోసం చేశాడు. ఈ నాలుగున్నరేళ్ల కాలంలో ఉద్యోగాల కోసం యువత వెయ్యి కళ్లతో ఎదురుచూశారు. ప్రతి సంవత్సరం జనవరిలో ఉద్యోగ నోటిఫికేషన్ వెలువడుతుందని ఎంతో ఆశ పడ్డారు. కానీ, వారి ఆశలన్నీ అడియాశలు అయ్యాయి. ప్రభుత్వం నుంచి కనీసం ఆర్థిక సహాయం కూడా అందలేదు. యువతీ, యువకుల కష్టాలు పట్టించుకునే నాథుడే కరువయ్యారు. అలాంటి సమయంలో మా జాతీయ పార్టీ ప్రధాన కార్యదర్శి నారా లోకేశ్ యువగళం పాదయాత్రను ప్రారంభించారు. యువతకు ఒక వేదికను ఏర్పాటు చేసి, వారి కష్టాలను తెలుసుకున్నారు. ఎవరూ ఊహించని విధంగా ఈ కార్యక్రమం విజయవంతమైంది. ఈరోజు తుని వద్ద 3000 కి.మీ పూర్తి చేసుకుని, పైలాన్ ఆవిష్కరించారు. శ్రీకాకుళం జిల్లా ఇచ్చాపురం వద్ద ఈ పాదయాత్రను ముగిద్దాం అనుకున్నారు. కానీ, ఈ ప్రభుత్వం ఇబ్బందిపెట్టడం వల్ల విశాఖలోనే ముగించేస్తున్నారు. గతంలో ఎక్కడైతే చంద్రబాబు పాదయాత్ర ముగించారో, అక్కడే ఈ నెల 18వ తేదీన యువగళం పాదయాత్ర ముగిస్తున్నాం.'' - అచ్చెన్నాయుడు, టీడీపీ రాష్ట్ర అధ్యక్షుడు