రాష్ట్రంలో ప్రైవేటు బస్సుల సంగతి సరే..! కొత్త ఆర్టీసీ బస్సులకు నిధుల్లేవంటే ఎలా !

No Funds To APSRTC : ప్రజారవాణా వ్యవస్థ మెరుగైన సేవలు అందుబాటులో ఉన్నప్పుడే అభివృద్ధిలో వేగం ఉంటుంది. అది కుంటుపడితే ప్రజలు ఇబ్బందులను ఎదుర్కోక తప్పదు. అధికారంలో ఉన్న రాష్ట్ర ప్రభుత్వం ఆర్టీసీని చిన్న చూపు చూస్తోంది. నూతనంగా బస్సుల కొనుగోలుకు బడ్జెట్​లో ఎటువంటి నిధులు కేటాయించలేదు. ఆర్టీసీలో ఉన్న పాత బస్సుల వల్ల నూతన బస్సులు లేక.. ఆర్టీసీ మనుగడే ప్రశ్నార్థకంగా మారుతుందని ఆర్టీసీ ఉద్యోగులు అంటున్నారు.

No Funds To Rtc New Buses Purchase : ఆర్టీసీని ప్రభుత్వంలో విలీనం చేశామని గొప్పలు చెప్పుకునే రాష్ట్ర ప్రభుత్వం ప్రయాణికుల సదుపాయాల కల్పనను గాలికి వదిలేసింది. ఎప్పటికప్పుడు కొత్త బస్సులు కొనుగోలు చేసి ప్రయాణికులకు మెరుగైన సేవలు అందిచాల్సి ఉండగా ఆ ఊసే మరిచింది. ఎన్నో ఏళ్లుగా ప్రయాణికులకు సేవలందిస్తున్న పాత బస్సులకే.. రంగులద్ది ప్రయాణికులను తరలింస్తోంది. 15 ఏళ్ల పైన ఉన్న బస్సులను వచ్చె నెల నుంచి పక్కన పెట్టాలన్న కేంద్రం ఆదేశాలతో.. ఆర్టీసీలో పెద్ద సంఖ్యలో బస్సులు సేవల నుంచి తప్పుకొనున్నాయి.

ఈ పరిస్ధితుల్లో ఈ ఏడాదైనా బడ్జెట్​లో ఆర్టీసీకి నిధులు కేటాయిస్తారని ఆశించిన ఆర్టీసీ అధికారులకు నిరుత్సాహమే ఎదురైంది. బడ్జెట్​లో ఎక్కడా కొత్త బస్సుల కొనుగోలు ప్రస్తావన తీసుకురాలేదు. సంస్థలో కొత్త బస్సుల కొనుగోలు లేకపోతే.. బస్సుల కొరత తీవ్రం కానుంది. నూతన బస్సులను కొనుగోలు చేయటానికి ప్రభుత్వం వెంటనే నిధులు మంజూరు చేయాలని ఆర్టీసీ ప్రయాణికులు, ఉద్యోగ సంఘాలు డిమాండ్ చేస్తున్నాయి.

పాత వాటికే రంగులేసి కొత్తగా మారుస్తున్నారు : ఎపీఎస్​ఆర్టీసీలో మొత్తం 11 వేల 82 బస్సులు ఉన్నాయి. వీటిలో సంస్థ యాజామాన్యంలో ఉన్నవి 8639 బస్సులు కాగా.. మిగిలిన 2443 బస్సులను అద్దెకు తీసుకుని నడిపిస్తున్నారు. అద్దె బస్సులన్నీ ఫిట్​నెస్ కలిగి మంచి కండిషన్ లోనే ఉండగా.. సంస్థకు సంబంధించిన బస్సులు మాత్రం చాలా పాత బస్సులే. 8 వేల 639 బస్సుల్లో సగానికి పైగా బస్సులు 10 లక్షల కిలోమీటర్లు పైగా తిరిగాయి. అందులో ముఖ్యంగా పల్లెవెలుగు బస్సులే ఎక్కువగా ఉన్నాయి. ప్రయాణికుల భద్రత దృష్ట్యా 12 లక్షల కిలోమీటర్లు పైన తిరిగిన బస్సులను పక్కన పెట్టాల్సి ఉన్నా.. గత్యంతరం లేని పరిస్ధితుల్లో పాత వాటికే మరమ్మతులు చేసి పైపైన రంగులేసి కొత్త వాటిలా తీర్చిదిద్ది ఆర్టీసీ తిప్పుతోంది. పాత బస్సుల్లో ప్రయాణిస్తూ ప్రజలు అవస్తలు పడుతున్నా ప్రభుత్వం పట్టించుకోవడం లేదనే విమర్శలు వస్తున్నాయి. కండిషన్ సరిగా లేని బస్సుల చక్రాలు ఊడుతూ అదుపు తప్పుతూ ప్రయాణికుల ప్రాణాలతో చెలగాటమాడుతున్నా ఏమీ చేయలేని స్ధితిలో ఉంది.

గత్యంతరం లేక పాత బస్సులనే నడుపుతున్న ఆర్టీసీ : కొత్త బస్సుల కోసం రాష్ట్ర ప్రభుత్వం నిధులు మంజూరు చేయకపోవడంతో.. గత్యంతరం లేని పరిస్ధితుల్లో సంస్థ పాత బస్సులను నడిపిస్తోంది. దీంతో ప్రయాణికులు ఎన్నో ఏళ్లుగా తీవ్ర అవస్థలు పడుతున్నారు. ఈ పరిస్ధితి ఇలా ఉంటే ఇటీవల కేంద్ర ప్రభుత్వం తెచ్చిన కొత్త నిబంధన ప్రకారం ప్రభుత్వ రవాణా సంస్ధల్లో 15 ఏళ్లు పైబడిన వాహనాల రిజిస్ట్రేషన్ నిలిపి వేయాల్సి ఉంది. దీనివల్ల ఏప్రిల్ నుంచి ఆర్టీసీలో భారీ సంఖ్యలో బస్సులు పక్కన పెట్టాల్సిన పరిస్ధితి వచ్చింది. కేంద్రం నిబంధనల ప్రకారం మరో 15 రోజుల తర్వాత బస్సులు గణనీయంగా తగ్గిపోనున్నాయి.

2వేల బస్సులు కావాలని ప్రతిపాదనలు ఉన్నా : బస్సుల సంఖ్య తగ్గితే ప్రయాణికులు ఇబ్బందులు ఎదుర్కోక తప్పదు. పలు రూట్లలో బస్సులను తిప్పలేని పరిస్ధితి నెలకొననుంది. ఈ పరిస్ధితిని ఎలా అధిగమించాలో తెలియక ఆర్టీసీ అధికారులు సతమతమవుతున్నారు. సంస్థలో పెద్ద ఎత్తున బస్సులు కొనుగోలు చేయాల్సిన అవసరం ఉందని అధికారులు అంటున్నారు. 2 వేల 736 బస్సులు కొనాలని నిర్ణయించినట్లు ఇటీవల ఎండీ ద్వారకాతిరుమల రావు ప్రకటించారు. వీటిలో 1500 దూర ప్రాంతలకు ప్రయాణీకులను చేరవేసే ఎసీ బస్సులు కాగా.. మిగిలినవి ఇతర బస్సులు ఉన్నాయి. వెయ్యి ఎలక్ట్రికల్​ బస్సులు కొనుగోలు చేయనున్నారు. వీటన్నింటికీ నిధులు ఇవ్వాలని ప్రభుత్వాన్ని కోరుతూ చాలా కాలం క్రితమే ప్రభుత్వానికి ప్రతిపాదనలు పంపారు.

బస్సుల కొనుగోలును పక్కన పెట్టిన వైసీపీ ప్రభుత్వం : బడ్జెట్​లో ఆర్టీసీకి ఆర్ధిక సాయం చేస్తారని ఆశించగా ఆశలు అడియాశలే అయ్యాయి. నాలుగేళ్ల క్రితం వరకూ ఏటా 2 వేల పాత బస్సులను పక్కన పెట్టి వాటి స్థానంలో కొత్త బస్సులను ఆర్టీసీ ప్రవేశపెట్టేది. బడ్జెట్​లో 200 కోట్లకు పైగా నిధులను అప్పటి ప్రభుత్వాలు బస్సుల కొనుగోలు కోసం కేటాయించేవి. వైసీపీ అధికారంలోకి వచ్చిన తర్వాత కొత్త బస్సుల కొనుగోళ్లు నిలిచిపోయాయి. ఆర్టీసీని ప్రభుత్వంలో విలీనం చేశామని గొప్పలు చెప్పే ప్రభుత్వం.. కొత్త బస్సుల కొనుగోలును పక్కన పెట్టేసింది. అర్టీసీ ప్రతిపాదనలు పంపినా.. నిధులు కేటాయించాల్సిన ప్రభుత్వం పైసా ఇవ్వకపోగా, ఆర్టీసీకి వచ్చే ఆదాయం నుంచి నెలకు 125 కోట్లు వసూలు చేస్తోంది.

ప్రైవేటు బస్సుల కోసం తలుపులు తెరిచిన ప్రభుత్వం : కొత్త బస్సుల కొనుగోళ్లను నాలుగేళ్లుగా పక్కన పెట్టిన రాష్ట్ర ప్రభుత్వం.. అద్దె బస్సులకు తలుపులు బార్లా తెరిచింది. గత ప్రభుత్వంలో ఆర్టీసీలో అద్దెబస్సులు 15 శాతానికి మించి ఉండేవి కాదు. వైసీపీ ప్రభుత్వంలో అద్దె బస్సుల సంఖ్య ఇప్పటికే 30 శాతానికి చేరింది. ఇటీవలే మరో వెయ్యి ప్రైవేటు బస్సులను రోడ్డెక్కించేందుకు ఆర్టీసీకి ప్రభుత్వం అనుమతులిచ్చింది. సొంతంగా బస్సులు కొని తిప్పితే సంస్థకు అధిక ఆదాయం వస్తుంది. అద్దె బస్సులతో సంస్థకు లాభం కంటే నష్టం ఎక్కువ. అద్దె బస్సులు పెరిగితే ప్రయాణికుల భద్రత గాల్లో దీపంలా మారే ప్రమాదం ఉంది. ఇప్పటి వరకు జరిగిన ప్రమాదాల్లో ఎక్కువగా అద్దెబస్సుల వల్లే జరుగుతున్నాయి. ఈ పరిస్ధితుల్లో కొత్త బస్సుల కొనుగోలుకు ప్రభుత్వం నిధులు ఇవ్వకపోతే ఆర్టీసీ మనుగడే ప్రశ్నార్థకమవుతుందని ఆర్టీసీలోని ఉద్యోగ సంఘాలు ఆందోళన వ్యక్తం చేస్తున్నాయి. ప్రభుత్వం ఇప్పటికైనా వెంటనే కొత్త బస్సుల కొనుగోలుకు నిధులు మంజూరు చేయాలని కోరుతున్నాయి.

ఇవీ చదవండి :