పేదల గుండెలు అల్లాడుతున్నా పట్టించుకోని జగన్-నిధులు కేటాయించని వైసీపీ ప్రభుత్వం

YSRCP Government Careless on Heart Patients: రాష్ట్రంలో పేదల గుండెలు అల్లాడుతున్నా వైసీపీ ప్రభుత్వానికి పట్టటం లేదు. తాను పుట్టిందే పేదల్ని ఉద్ధరించడానికి అన్నట్లు స్వయంగా గొప్పలు చెప్పుకునే సీఎం జగన్‌, ఆరోగ్యశ్రీలో చేస్తున్న హృద్రోగ శస్త్ర చికిత్సలకు సరిపడా కేటాయింపులు చేయటంలేదు. అయినా తాను ఒక్కరే పేదల పక్షమన్నట్లు, మిగతా వారంతా పెత్తందారులు అన్నట్లు ప్రతిపక్షాలపై విరుచుకుపడుతుంటారు.

YSRCP Government Careless on Heart Patients :గుండె శస్త్రచికిత్సలకు రాష్ట్ర ప్రభుత్వం ఇచ్చే నిధులు చాలడం లేదని చాలా ప్రైవేటు ఆస్పత్రులు గగ్గోలు పెడుతున్నాయి. గుండె శస్త్రచికిత్సల్లో పెద్దవారితో పోలిస్తే పిల్లలకు ఎక్కువ ఖర్చు అవుతుండడంతో వారికి ఆపరేషన్లు చేసేందుకు ఆసక్తి చూపడం లేదు. ప్రస్తుతానికి ఆయా ఆస్పత్రులు తప్పని పరిస్థితుల్లో గుండె ఆపరేషన్లు చేస్తున్నాల ఖర్చు తగ్గించుకోవడానికి వాడిన పరికరాల్నే పదేపదే వాడుతున్నాయి. ఇది కొన్ని సందర్భాల్లో రోగులకు ప్రాణసంకటంగా మారడంతో పాటు ఇతర అనారోగ్య సమస్యలకూ దారితీస్తోంది.

Heart Patients Conditions in Aarogyasri Due to Lack of Funds :కరోనరీ ఆర్టెరీ బైపాస్ గ్రాఫ్ట్​ సామాన్య పరిభాషలో చెప్పాలంటే గుండెకు చేసే బైపాస్ ఆపరేషన్, ఆరోగ్యశ్రీ కింద ఈ ఆపరేషన్ చేయడానికి రాష్ట్ర ప్రభుత్వం లక్షా18 వేల 881 రూపాయలు ఇస్తోంది. ఇదే శస్త్రచికిత్సకు ఆయుష్మాన్ భారత్‌లో కేంద్రం లక్షా84వేల500 ఇస్తోంది. ఇది రాష్ట్రం ఇస్తున్నదానికంటే 55.20 శాతం అంటే 65 వేల 619 రూపాయలు ఎక్కువ. ఒక్క బైపాస్ సర్జరీనే కాదు ప్రతి ఆపరేషన్‌కు కేంద్రంతో పోలిస్తే రాష్ట్రం తక్కువ నిధులివ్వడం పేదలపాలిట శాపంగా మారింది. పెద్దలు, పిల్లల్లో ఎక్కువగా నిర్వహించే 43 రకాల గుండె ఆపరేషన్లకు సంబంధించి కేంద్రంతో పోలిస్తే రాష్ట్రం 10 నుంచి 200 శాతం వరకు అంటే 50 వేల నుంచి సుమారు 2 లక్షల వరకు తక్కువగా ఇస్తోంది.

గిట్టుబాటు కాదట్టున్న ప్రైవేటు ఆసుపత్రులు :పెద్దలు, పిల్లలు, శిశువుల్లో హృద్రోగ సమస్యలకు చేసే శస్త్ర చికిత్సల్లో 95శాతం వరకు బైపాస్, కవాటం మార్పిడి, పిల్లల గుండెలో రంధ్రం పూడ్చే ఆపరేషన్లే ఉంటాయి. పెద్దల్లో ఎక్కువగా బైపాస్ సర్జరీతో పాటు కవాటం మార్పిడి, కవాటం మరమ్మతు ఆపరేషన్లు ఎక్కువగా చేయాల్సి ఉంటుంది. ఇలాంటి పరిస్థితుల్లో పేదలు, మధ్యతరగతి వర్గాల ఆరోగ్యంపై ఎక్కువ దృష్టిపెట్టి, ఉదారంగా నిధులివ్వాల్సిన వైసీపీ ప్రభుత్వం దానికి భిన్నంగా వ్యవహరిస్తోంది. పెద్దల్లో కవాటం మార్పిడి, మరమ్మతు శస్త్రచికిత్సలకు కేంద్రం ఇస్తున్న ప్యాకేజీ కంటే రాష్ట్రం ఆరోగ్యశ్రీ కింద ఇస్తున్న ప్యాకేజీ లక్షా8 వేల నుంచి లక్షా11 వేల వరకు తక్కువ ఉంది. ఇంత తక్కువ మొత్తంలో శస్త్రచికిత్సలు చేయడం తమకు గిట్టుబాటు కాదని ప్రైవేటు ఆస్పత్రులు చెబుతున్నాయి.

దాతల సహకారంలో గుండె ఆపరేషన్లు : రాష్ట్రంలో ఏటా గుండె సంబంధిత సమస్యలతో జన్మించే శిశువుల సంఖ్య 6వేల వరకు ఉంటుందని అంచనా. వారిలో 10 శాతానికి మందులతోనే సమస్యను తగ్గించవచ్చు. మరో 10 శాతానికి పరికరాల్ని అమర్చి చికిత్స చేయొచ్చు. మిగతా 80శాతం మంది పిల్లలకు ఆపరేషన్లు చేయాల్సిందే. ఇలాంటి పిల్లల్లో అత్యధికులు పేదవర్గాల వారేనని వైద్యులు చెబుతున్నారు. పిల్లల గుండెల్లో రంధ్రం పూడ్చడానికి ఖర్చులను మాత్రమే పరిగణనలోకి తీసుకున్నా లక్ష రూపాయల వరకు అవుతుంది. ప్రభుత్వం 87 వేలు మాత్రమే ఇస్తోంది.

ఆపరేషన్ థియేటర్‌లో వాడే పరికరాలకే 60 నుంచి 70 వేల వరకు ఖర్చవుతుంది. అందుకే పిల్లల ఆపరేషన్లు చేయడానికి ఆస్పత్రులు ముందుకు రావడం లేదని నిపుణుడొకరు తెలిపారు. 28 రోజుల్లోపు వయసు శిశువు నుంచి అన్ని వయసుల పిల్లలకు ఆరోగ్యశ్రీ కింద గుండె శస్త్రచికిత్సలు చేస్తున్న ఆస్పత్రులు ప్రస్తుతం తిరుపతిలో ఒకటి, ప్రైవేటు రంగంలో విజయవాడలో మరొకటి ఉన్నాయి. అక్కడ ప్రభుత్వం ఇచ్చే నిధులు చాలకపోయినా దాతల సహకారంతో పిల్లలకు ఆపరేషన్లు చేయగలుగుతున్నారు.

స్పష్టం చేసిన వైద్య ఆరోగ్యశాఖ ముఖ్య కార్యదర్శి : ఆరోగ్యశ్రీని అమలు చేస్తున్న ఆస్పత్రులు చాలా చికిత్సలకు ప్రభుత్వమిచ్చే ఛార్జీలు తమకు గిట్టుబాటు కావడం లేదని, పెంచాలని చాన్నాళ్లుగా డిమాండ్ చేస్తున్నాయి. ఇటీవల ఒక సమీక్షలో వైద్య ఆరోగ్యశాఖ ముఖ్య కార్యదర్శి కృష్ణబాబు దానిపై స్పందిస్తూ 'ఆయుష్మాన్ భారత్ (Ayushman Bharat)' లో ఇస్తున్నదాని కంటే ఎక్కువ ఇవ్వడం కుదరదని స్పష్టం చేశారు. ఆయుష్మాన్ భారత్, ఆరోగ్యశ్రీల ప్యాకేజీలు దాదాపు సమానంగా, కొద్దిపాటి వ్యత్యాసం మాత్రమే ఉన్న ఛార్జీలను దృష్టిలో ఉంచుకుని ఆయన ఆ మాటలన్నారు.