Beneficiaries fire on YCP govt: ప్రారంభించారు సరే.. తాళాలు ఎప్పుడిస్తారు.. లబ్ధిదారుల ఆవేదన

TIDCO beneficiaries fire on YSRCP government: ముఖ్యమంత్రి జగన్‌పై, మాజీ మంత్రి కొడాని నానిపై కృష్ణా జిల్లా గుడివాడ టిడ్కో గృహాల లబ్ధిదారులు ఆగ్రహం వ్యక్తం చేస్తున్నారు. అట్టహాసంగా టిడ్కో గృహాల సముదాయానైతే ప్రారంభించారనే గానీ లబ్ధిదారులకు తాళాలు ఎందుకు ఇవ్వలేదని దుయ్యబడుతున్నారు. స్వార్థ రాజకీయ ప్రయోజనాల కోసం పేదలను బలి చేస్తున్నారా..? అంటూ విమర్శిస్తున్నారు.

TIDCO beneficiaries fire on YSRCP government: ''రాష్ట్రంలో జగనన్న సర్కార్‌ నిర్మిస్తోంది జగనన్న కాలనీలు కాదు.. ఏకంగా ఊర్లు కడుతున్నాం. అధికారంలోకి వచ్చాక ఉచితంగా టిడ్కో ఇళ్లు కట్టిస్తామని ఆనాడూ హామీ ఇచ్చాం.. ఈరోజు నెరవేర్చాం. ప్రతీ లబ్ధిదారునికి రూ.7 లక్షల ఆస్తిని ఉచితంగా ఇచ్చాం. అక్కాచెల్లెమ్మల చేతిలో రూ.6 నుంచి 15 లక్షల ఆస్తిని పెట్టాం. పేదలకు 300 అడుగుల టిడ్కో ఇళ్లను ఉచితంగా ఒక్క రూపాయికే ఇచ్చాం. 257 ఎకరాల స్థలం సేకరించి.. ఒక పక్క టిడ్కో ఇళ్లు, మరోపక్క ఇళ్ల స్థలాలిచ్చి నిర్మాణం చేస్తున్నాం. వీటన్నింటి మధ్య ఈరోజు నాకు కొత్త గుడివాడ నగరం కనిపిస్తోంది'' అంటూ సరిగ్గా వారం రోజులక్రితం ముఖ్యమంత్రి జగన్.. కృష్ణా జిల్లా గుడివాడ బహిరంగ సభలో వ్యాఖ్యానించారు. ఆ వ్యాఖ్యలపై నేడు గుడివాడ టిడ్కో గృహాల నివాసులు తీవ్రంగా ఆగ్రహం వ్యక్తం చేస్తున్నారు. సీఎం జగన్‌కు మాటలు ఎక్కువ-చేతలు తక్కువ అంటూ విమర్శిస్తున్నారు.

తాళాలివ్వండి మహోప్రభో..కృష్ణా జిల్లా గుడివాడలో టిడ్కో గృహాల సముదాయాన్ని సీఎం జగన్ ప్రారంభించి.. వారం గడుస్తున్నా ఫ్లాట్ల తాళాలు మాత్రం ఇంకా లబ్ధిదారులకు అందలేదు. సాక్షాత్తూ సీఎం ఎంతో అట్టహాసంగా ప్రారంభించి.. గృహ ప్రవేశాలు చేసిన ఇళ్లకు కూడా వేసిన తాళాలు వేసినట్టే ఉన్నాయి. ప్లాట్లను ఎప్పుడు అప్పగిస్తారో తెలియక లబ్ధిదారులు కళ్లు కాయలు కాచేలా ఎదురుచూస్తున్నారు. ఎంతో గొప్పగా తమ ఇళ్లను బంధువులకు చూపించేందుకు వచ్చిన లబ్ధిదారులు నిరాశతో వెనుదిరుగుతున్నారు. అన్ని వసతులతో అట్టహాసంగా ఇళ్లు ఇస్తున్నాం అని.. సీఎం చెప్పినప్పటికీ క్షేత్రస్థాయి పరిస్థితులు అందుకు విరుద్ధంగా ఉన్నాయంటూ ఆవేదన చెందుతున్నారు.

అరకొరగ పనులు-అయోమాయంలో లబ్ధిదారులు..అంతేకాదు, సీఎం జగన్ పంపిణీ చేసినటిడ్కో గృహాల్లో కనీస సౌకర్యాలు కూడా లేవని లబ్ధిదారులు ఆగ్రహం వ్యక్తం చేస్తున్నారు. చాలా ఇళ్లు చెదలు పట్టి శిథిలావస్థకు చేరుకుంటుండటంతో ఇక్కడెలా ఉండాలంటూ ఆందోళన చెందుతున్నారు. ఇప్పటికీ లేఅవుట్లో పైప్​లైన్ల ఏర్పాటు, ప్రధానమైన త్రాగునీటి ప్రాజెక్టు నిర్మాణ పనులు ఇంకా కొనసాగుతూనే ఉన్నాయి. డ్రైనేజీ వ్యవస్థ కూడా అరకొరగానే ఉంది. వీధిలైట్ల ఏర్పాటు ఇంకా ప్రతిపాదనల దశలోనే ఉండడంతో లైట్లు ఎప్పుడు పెడతారో అర్థంకాక లబ్ధిదారులు అయోమాయంలో పడ్డారు.

సీఎం జగన్‌పై లబ్ధిదారులు ఆగ్రహం..మరోవైపు నాలుగు సార్లు కృష్ణా జిల్లా గుడివాడ టిడ్కో గృహాల పంపిణీ కార్యక్రమం వాయిదా పడింది. ఈనెల 16వ తేదీన సీఎం జగన్.. మల్లాయపాలెం వద్ద నిర్మాణం పూర్తి చేసుకున్న 8,912 ప్లాట్ల సముదాయాన్ని అట్టహాసంగా ప్రారంభించారు. అనంతరం అక్కడ ఏర్పాటు చేసిన బహిరంగ సభలో ప్రసంగిస్తూ.. ప్రతిపక్షాలపై విమర్శలు గుప్పించారు. కానీ, వారం రోజులు గడిచినా ఇంకా లబ్ధిదారులకు ఫ్లాట్ల తాళాలు ఇవ్వలేదు. దీంతో లబ్ధిదారులు ముఖ్యమంత్రి జగన్‌పై, గుడివాడ ఎమ్మెల్యే కొడాలి నానిపై తీవ్రంగా ఆగ్రహిస్తున్నారు. స్వార్థ రాజకీయ ప్రయోజనాల కోసమే పేద ప్రజలను బలి చేస్తున్నారని విమర్శిస్తున్నారు. కనీస మౌలిక వసతులు ఏర్పాటు చేయకుండా లేఅవుట్‌ను ఎలా ప్రారంభిస్తారని నిలదీస్తున్నారు. లబ్ధిదారులకు తాళాలు ఎప్పుడు అప్పగిస్తారో చెప్పాలని డిమాండ్ చేస్తున్నారు.