Young skaters: జాతీయ స్థాయి రోలర్ స్కేటింగ్ క్రీడల్లో విజయవాడ నగరానికి చెందిన చైత్రదీపిక, కైవల్య స్వర్ణపథకాలు సాధించారు. వీరు కాళ్లకు రోలర్స్ కట్టుకొని గ్రౌండ్లో దిగారంటే సెకెన్స్లో ఆ గ్రౌండ్ ని చుట్టివస్తారు. వారు చేసే స్కేటింగ్ విధానం చూస్తే కళ్లు చెదిరిపోతాయి. ఇప్పటికే జిల్లా, రాష్ట్ర స్థాయిల్లో పలు పథకాలు సొంతం చేసుకున్న వీరు జాతీయ స్థాయిల్లోనూ పథకాలు సాధించారు. చిన్న నాటి నుంచే స్కేటింగ్ మీద ఉన్న ఆసక్తితో తల్లిదండ్రలు ప్రోత్సాహంతో ప్రస్తుతం మంచి ప్రతిభ కనబరుస్తున్నారు. వీరి ప్రతిభను గుర్తించిన పలువురు ప్రముఖులు వీరిని అభినందించారు. జాతీయ స్థాయి స్కేటింగ్ క్రీడల్లో స్వర్ణ, పథకాలతో పాటు మరిన్ని పథకాలు సాధించిన చైత్రదీపిక, కైవల్యపై ప్రత్యేక కథనం.
ఐదేళ్ల వయస్సు నుంచి శిక్షణ: విశాఖ జిల్లా నర్సీపట్నానికి చెందిన పెదిరెడ్ల రామసతీష్, లలితదేవి దంపతుల కుమార్తె చైత్రదీపిక నాలుగేళ్ల వయస్సు నుంచే స్కేటింగ్ క్రీడ మీద ఆసక్తి పెంచుకుంది. తండ్రి ఉద్యోగ రిత్యా విజయవాడలో స్థిరపడటంతో కృష్ణా జిల్లా తరుపున క్రీడల్లో ప్రాతినిధ్యం వహిస్తుంది. చైత్రదీపిక తల్లిదండ్రులు చిన్నప్పటి నుంచి ఆట స్థలాలకి తీసుకెళ్లే వారు.. అప్పుడే స్కేటింగ్ మీద ఆసక్తి పెంచుకున్న దీపిక స్కెటింగ్ నేర్చుకుంటానని తల్లి లలితతో చెప్పింది.. దీంతో తమ కుమార్తెకు స్కెటింగ్ నేర్పించాలనుకున్న తల్లిదండ్రులు విశాఖలో ఓ కోచ్ వద్ద శిక్షణ ఇప్పించారు. ఐదేళ్ల వయస్సు నుంచి స్కేటింగ్లో శిక్షణ పొందుతూ.. రోజు రోజుకీ తన సామర్థ్యాన్ని దీపిక పెంచుకుంది.
జాతీయ స్థాయి పోటీల్లో స్వర్ణం: 2022 డిసెంబర్ 11 నుంచి 22 వరకు బెంగళూరులో జరిగిన జాతీయ స్థాయి పెయిర్ స్కేటింగ్ పోటీల్లో స్వర్ణ పథకాన్ని సొంతం చేసుకుంది. ప్రస్తుతం విజయవాడలోని సెయింట్ మాధ్యూస్ స్కూల్లో ఏడో తరగతి చదువుతోంది. క్రీడలతో పాటు తమ కుమార్తె చదువుల్లోనూ రాణిస్తుందని చైత్రదీపిక తల్లిదండ్రులు చెబుతున్నారు. తమ కుమార్తె జాతీయ స్థాయి స్కేటింగ్ పోటీల్లో స్వర్ణం గెలుచుకోవడం తమకు సంతోషంగా ఉందన్నారు. రాష్ట్రం, దేశంలో ఎక్కడ స్కేటింగ్ క్రీడలు జరిగినా తన కుమార్తె చైత్రదీపికతో కలసి వెళతానని తండ్రి సతీశ్ చెబుతున్నారు. దీపిక తల్లి లలితి గృహిణిగా ఉంటూ నిరంతరం క్రీడల్లో పాటించాల్సిన జాగ్రత్తలు, మెళుకువల గురించి చెబుతుందని చైత్రదీపిక చెబుతుంది.