Cracks In Bridge On Yerra Katta: రాష్ట్రంలోని రహదారులను అందంగా తీర్చిదిద్దుతున్నామని గొప్పలు చెప్పుకుంటున్న రాష్ట్ర ప్రభుత్వం.. విజయవాడలోని ఎర్రకట్ట రహదారి, రైల్వే బ్రిడ్జ్ పనులు మాత్రం పూర్తి చేయడం లేదు. పాతబస్తీ ఎర్రకట్ట పై వంతెన మరమ్మతుల అంశంలో అటు విజయవాడ నగర పాలక అధికారులు, ఇటు రైల్వే అధికారులు పట్టనట్లు వ్యవహరిస్తున్నారు. రెండేళ్లకు ముందు ఈ రైల్వే వంతెన శిథిలావస్థకు చేరుకుందని ఈ రహదారిని రైల్వే అధికారులు మూసివేశారు. అయినా ఈ చుట్టు పక్కల ప్రాంతాల్లో నివసిస్తున్న ప్రజలు పంజా సెంటర్ రైల్వే స్టేషన్ వంటి ప్రాంతాలకు వెళ్లాలంటే ఈ దారిలోనే రాకపోకలు సాగిస్తున్నారు.
ప్రజలకు ఎలాంటి ప్రమాదం జరగకూడదని అధికారులు ఈ రహదారికి అడ్డంగా మట్టి, రాళ్లు వేసి మూసివేయడం సరి అయినది అయినా.. ప్రజలకు మరొక ప్రత్యమ్నాయం లేక ఆ మట్టిని దాటుకుంటూ వెళ్తున్నారు. ఈ బ్రిడ్జ్ క్రింద నుంచి ప్రయాణం ప్రమాదం అని తెలిసినా తప్పడం లేదని వాహనదారులు ఆవేదన చెందుతున్నారు. రాత్రి పూట ఈ రహదారిలో ప్రయాణించడం ప్రమాదమంటున్నారు. పక్కనే ఉండే ప్రాంతాలకు ఇతర రహదారుల నుంచి వెళ్లాలంటే అదనంగా రెండు కిలోమీటర్లు ప్రయాణం చేయాలని వాపోతున్నారు.