Yerragondapalem issue: చంద్రబాబు వాహనంపై రాళ్ల దాడిపై టీడీపీ సీరియస్.. కేంద్ర హెం శాఖకు ఫిర్యాదు

TDP Serious on Yerragondapalem incident: తెలుగుదేశం పార్టీ అధినేత చంద్రబాబు యర్రగొండపాలెం పర్యటనలో రాళ్ల దాడి ఘటనను ఆ పార్టీ సీరియస్‌గా తీసుకుంది. ఈ నేపథ్యంలోనే హైకోర్టు న్యాయవాది గూడపాటి లక్ష్మీనారాయణ కేంద్ర హోంశాఖ కార్యదర్శి అజయ్‌ కుమార్‌ భల్లాకు ఫిర్యాదు చేశారు.

TDP Serious on Yerragondapalem incident: తెలుగుదేశం పార్టీ అధినేత నారా చంద్రబాబు నాయుడు చేపట్టిన 'ఇదేం ఖర్మ మన రాష్ట్రానికి' కార్యక్రమంలో భాగంగా ప్రకాశం జిల్లా పర్యటనలో శుక్రవారం సాయంత్రం వైఎస్సార్సీపీ కార్యకర్తలు బీభత్సం సృష్టించారు. గిద్దలూరు, మార్కాపురంలో తన పర్యటనను ముగించుకుని యర్రగొండపాలెం బయలుదేరినా చంద్రబాబును.. ఎలాగైనా అడ్డుకోవాలంటూ మంత్రి ఆదిమూలపు సురేష్‌.. వైసీపీ కార్యకర్తలను కోరడంతో దాదాపు 200 మంది రహదారి వెంట నిల్చొని ‘చంద్రబాబు గో బ్యాక్‌’ అంటూ ప్లకార్డులతో, నల్లజెండాలు, నల్ల బెలూన్లు చూపుతూ.. చంద్రబాబు ఉన్న వాహనంపై రాళ్ల దాడి చేశారు. దీంతో అప్రమత్తమైన భద్రతా సిబ్బంది.. బుల్లెట్‌ ప్రూఫ్‌ జాకెట్లను అడ్డుపెట్టి చంద్రబాబుకు రక్షణ కవచంలా నిలిచారు. ఈ క్రమంలో ఎన్‌ఎస్‌జీ కమాండెంట్‌ సంతోష్‌ కుమార్‌ తలకు గాయాలయ్యాయి.

కేంద్ర హెం శాఖ కార్యదర్శికి హైకోర్టు న్యాయవాది ఫిర్యాదు: ఈ నేపథ్యంలో టీడీపీ అధినేత చంద్రబాబును లక్ష్యంగా చేసుకొని వైసీపీ నాయకులు చేసిన రాళ్లదాడిని ఆ పార్టీ తీవ్రంగా పరిగణించింది. ఈ వ్యవహారంపై గవర్నర్‌ను కలిసి ఫిర్యాదు చేయాలని నిర్ణయించింది. ఈ నేపథ్యంలో హైకోర్టు న్యాయవాది గూడపాటి లక్ష్మీనారాయణ కేంద్ర హోంశాఖ కార్యదర్శి అజయ్‌ కుమార్‌ భల్లాకు ఫిర్యాదు చేశారు. మాజీ సీఎం చంద్రబాబు పట్ల పోలీసులు 151 సీఆర్పీసీని దుర్వినియోగం చేశారని ఫిర్యాదులో తెలిపారు. వీఐపీ భద్రత కోసం ఉన్న పోలీసు స్టాండింగ్‌ ఆర్డర్లను ఉల్లంఘిస్తున్నారని ఫిర్యాదు చేశారు. సంఘ వ్యతిరేక వ్యక్తులతో పోలీసుల సానుభూతి వ్యవహారం పట్ల విచారణ జరిపించాలని విజ్ఞప్తి చేశారు. ఈ అంశంపై సమగ్ర విచారణ జరిపి చర్యలు తీసుకోవాలని అజయ్‌కుమార్‌ భల్లాను గూడపాటి లక్ష్మీనారాయణ కోరారు.

టీడీపీ ముఖ్య నేతలతో టెలికాన్ఫరెన్స్..నిన్న యర్రగొండపాలెంలో చోటుచేసుకున్న ఉద్రిక్త పరిస్థితులపై శనివారం టీడీపీ నేతలతో చంద్రబాబు టెలికాన్ఫరెన్స్‌లో చర్చించిన విషయం తెలిసిందే. ఇందులో భాగంగా ఇప్పటికే నిన్నటి ఘటన దృశ్యాలను గవర్నర్‌కు ఈ-మెయిల్‌ద్వారా పంపినట్టు సమాచారం. యర్రగొండపాలెం ఘటన వివరాలను రాజ్ భవన్‌తో పాటు డీజీపీ కార్యాలయానికి తెలుగుదేశం పంపింది.

ఆ మెయిల్‌లో.. ఆంధ్రప్రదేశ్‌లో వైఎస్సార్సీపీ అధికారంలోకి వచ్చినప్పటి రోజు నుంచి తెలుగుదేశం పార్టీపై జరిగిన ఘటనలను ప్రస్తావించింది. ముందుగా యర్రగొండపాలెం పోలీస్ స్టేషన్‌లో దీనిపై స్థానికులు ఫిర్యాదు చేయడంతో పాటు ప్రకాశం జిల్లా ఎస్పీకి ఫిర్యాదు చేయనున్నారు. వైసీపీ ప్రభుత్వ హయాంలో దళితులకు జరుగుతున్న అన్యాయాలను, దళితులపై జరుగుతున్న దాడులను ఎలుగెత్తి చాటాలని పార్టీ నేతలకు అధిష్ఠానం దిశానిర్దేశం చేసింది.

ఈ కుట్ర సీఎం జగన్‌ది-ఐ-ప్యాక్‌దే..మాజీ ముఖ్యమంత్రి, ప్రస్తుత ప్రతిపక్ష నేత చంద్రబాబు వాహన శ్రేణీపై జరిగిన రాళ్ల దాడిపై టీడీపీ నాయకులు ఘాటుగా స్పందించారు. ముందుగా తెలుగుదేశం పార్టీ రాష్ట్ర అధ్యక్షుడు అచ్చెన్నాయుడు రెండు పేజీల లేఖను విడుదల చేశారు. ''ప్రతిపక్ష నేత చంద్రబాబుపై జరిగిన రాళ్ల దాడి ప్లాన్ సీఎం జగన్ రెడ్డిది, ఐ-ప్యాక్‌దే. రూట్ మ్యాప్ తెలుసుకుని మరీ దాడికి దిగుతుంటే పోలీసులు ఏం చేస్తున్నారు. జగన్ రెడ్డి సమావేశాల్లో ప్రతిపక్షాల నిరసనలకు పోలీసులు అనుమతిస్తారా..?. మంత్రి సురేష్ రౌడీ మూకల్ని ముందస్తు అరెస్టు ఎందుకు చేయలేదు..?. దళితుల్లో జగన్ రెడ్డిపై పెరుగుతున్న వ్యతిరేకతను మళ్లించాడినికే ఈ రాళ్ల దాడి కుట్ర. ఎన్ఎస్‌జీ కమాండోలను రెచ్చగొట్టి, దళితులపై కాల్పులు జరిపే కుట్ర చేశారు. కుట్ర, దాడులు, పోలీసు వైఫల్యాలపై గవర్నర్ చర్యలు తీసుకోవాలి. దాడి జరగబోతోందని ముందే డీజీపీ, జిల్లా ఎస్పీలకు ఫిర్యాదు చేశాం. చంద్రబాబుపై రాళ్ల దాడి పోలీసులు, జగన్ రెడ్డి కలిసి కుట్ర చేశారు. జగన్ రోడ్డెక్కితే పరదాలు, కందకాలు, గృహ నిర్బంధాలు చేస్తారు. చంద్రబాబు పర్యటనపై దాడి జరగబోతోందని తెలిసినా కూడా ఎందుకు అడ్డుకోలేదు..?. కాన్వాయ్ రూట్ మ్యాప్ అందించి మరీ పోలీసులు దాడికి సహకరించారు. మంత్రి రోడ్డుపై చొక్కా విప్పి వీధి రౌడీలా వ్యవహరించారు.'' అని ఆయన మండిపడ్డారు.

ఏసీబీ, జేసీబీ, పీసీబీ పాలన క్లైమాక్స్‌కు చేరింది..టీడీపీ అధినేత చంద్రబాబు కాన్వాయ్‌పై జరిగిన రాళ్ల దాడి ఘటనపై.. ఆ పార్టీ పొలిట్ బ్యూరో సభ్యులు యనమల రామకృష్ణుడు మండిపడ్డారు. జగన్ రెడ్డి అరాచక పాలనకు ఈ ఘటన నిదర్శనమని ధ్వజమెత్తారు. ఓటమి భయం జగన్ రెడ్డిలో పీక్ స్టేజ్‌కి చేరిందన్నారు. రాష్ట్రంలో ఏసీబీ, జేసీబీ, పీసీబీ పాలన క్లైమాక్స్‌కు చేరిందని ఎద్దేవా చేశారు. జగన్‌ని ఆదర్శంగా తీసుకుని వైఎస్సార్సీపీ మంత్రులు, ఎమ్మెల్యేలు నీచ రాజకీయాలు చేస్తున్నారని ఆక్షేపించారు. దళితలకు తలవంపులు తెచ్చేలా మంత్రి ఆదిమూలపు సురేష్ వ్యవహార శైలి ఉందని దుయ్యబట్టారు. చంద్రబాబు భద్రతపై డీజీపీకి ముందే ఫిర్యాదు చేసినా ఎందుకు పట్టించుకోలేదని ప్రశ్నించారు. రూల్స్ బ్రేక్ చేస్తున్న పోలీసులు తగిన మూల్యం చెల్లించాల్సిందేనని ఆక్షేపించారు.

మంత్రి పదవి నుంచి సురేష్‌ను బర్తరఫ్ చేయాలి..చంద్రబాబుపై యర్రగొండపాలెంలో జరిగిన రాళ్ల దాడి పిరికిపంద చర్య అని మాజీ మంత్రి చినరాజప్ప పేర్కొన్నారు. మంత్రి ఆదిమూలపు సురేష్‌ వీధి రౌడీలా ప్రవర్తించడం చాలా దారుణమని ఆక్షేపించారు. తక్షణమే మంత్రి పదవి నుంచి సురేష్‌ను గవర్నర్ బర్తరఫ్ చేయాలని ఆయన డిమాండ్ చేశారు. దాడులపై పోలీసులకు ముందే ఫిర్యాదు చేసినా పట్టించుకోలేదని చిన రాజప్ప ఆగ్రహం వ్యక్తం చేశారు. ప్రతిపక్షాలను నిలువరించాలనుకుంటే ప్రజాస్వామ్య స్ఫూర్తి దెబ్బతింటుందని వ్యాఖ్యానించారు.

రాళ్లదాడి చేస్తుంటే పోలీసులు ఏం చేస్తున్నారు?.. చంద్రబాబు కాన్వాయ్‌పై రాళ్లదాడి చేస్తుంటే పోలీసులు చోద్యం చూస్తున్నారని నక్కా ఆనందబాబు మండిపడ్డారు. చంద్రబాబు ర్యాలీని అడ్డుకోవడానికి ప్రయత్నిస్తుంటే పోలీసులు ఏం చేస్తున్నారు..? అని ప్రశ్నించారు. దళితుల ఓట్లను దండుకొని వైఎస్సార్సీపీ అధికారంలోకి వచ్చిందని, దళితులకు ఉన్న పథకాలను జగన్ ప్రభుత్వం రద్దు చేసిందని గుర్తు చేశారు. మాస్క్‌లు అడిగిన డాక్టర్‌ను పిచ్చోడనే ముద్ర వేసి చంపారని, సీఎం సొంత జిల్లాలో దళిత డాక్టర్‌ అచ్చెన్నను హత్య చేస్తే ప్రభుత్వం పట్టించుకోలేదని ధ్వజమెత్తారు. దళితుల కోసం వేల కోట్ల రూపాయలు ఖర్చు పెట్టిన నాయకుడు చంద్రబాబు అని తెలిపారు. టీడీపీ హయాంలో దళితులకు ఉన్న 27 పథకాలను వైసీపీ ప్రభుత్వం రద్దు చేసిందన్నారు. మంత్రి సురేశ్‌ క్యాంప్‌ కార్యాలయం వద్ద రౌడీలను పెట్టుకుని దాడికి పాల్పడ్డారని.. వైసీపీ నాయకుల అసహనం పరాకాష్ఠకు చేరిందని ఆయన వివరించారు.

ఈ ఘటనపై ప్రధాని మోదీ జోక్యం చేసుకోవాలి.. ప్రకాశం జిల్లా యర్రగొండపాలెం ఘటనపై ప్రధాని మోదీకి వైఎస్సార్సీపీ ఎంపీ రఘురామకృష్ణంరాజు లేఖ రాశారు. ఆ లేఖలో ఆయన పలు కీలక విషయాలను పేర్కొన్నారు. చంద్రబాబుపై దాడికి రాష్ట్ర ప్రభుత్వ వైఫల్యమే కారణమని వివరించారు. ప్రధాని మోదీ వెంటనే ఈ ఘటనపై వెంటనే జోక్యం చేసుకోవాలని ఆయన విజ్ఞప్తి చేశారు. యర్రగొండపాలెం ఘటనకు సంబంధించిన వివరాలన్నింటిని ఆ లేఖలో పొందుపరిచినట్లు ఎంపీ రఘురామకృష్ణంరాజు తెలిపారు.

ఇవీ చదవండి