TDP Leaders Fire on YSRCP Leaders :ఏపీ స్కిల్ డెవలప్మెంట్ కేసులో తెలుగుదేశం అధినేత, మాజీ సీఎం నారా చంద్రబాబు నాయుడు పిటిషన్పై సుప్రీంకోర్టు ఇచ్చిన తీర్పును అధికార యంత్రాంగం వక్రభాష్యం చెబుతోందని ఆ పార్టీ ఎంపీ కనకమేడల రవీంద్ర కుమార్ ఆగ్రహం వ్యక్తం చేశారు. కోర్టు అంశాలను ఎవరికి నచ్చినట్టు వాళ్లు రాయడానికి వీలు లేదని గుర్తు చేశారు. ఈ కేసులో సెక్షన్ 17A వర్తింపునకు సంబంధించి ఇద్దరు న్యాయమూర్తులు భిన్నమైన అభిప్రాయాలు వ్యక్తం చేశారని వివరించారు.
చంద్రబాబు ప్రతిష్ఠను దెబ్బతీసేందుకు ప్రయత్నాలు : అబద్ధాలు, అసత్య ప్రచారాలే అజెండాగా వైఎస్సార్సీపీ నేతలు, మంత్రులు పని చేస్తున్నారని తెలుగుదేశం రాష్ట్ర అధ్యక్షుడు అచ్చెన్నాయుడు ధ్వజమెత్తారు. రాజకీయ ప్రయోజనాల కోసం కోర్టు తీర్పులకు కూడా వక్రభాష్యాలు చెప్పడం వైఎస్సార్సీపీ నేతలకు పరిపాటిగా మారిందని దుయ్యబట్టారు. స్కిల్ డెవలప్మెంట్ కేసులో సుప్రీంకోర్టు ఇచ్చిన తీర్పునకు అధికార పార్టీ నేతలు వక్రభాష్యం చెబుతున్నారని మండిపడ్డారు.
చంద్రబాబు క్వాష్ పిటిషన్ - ధర్మాసనం భిన్నాభిప్రాయాలతో సీజేఐ ముందుకు
సహజ న్యాయసూత్రాలకు విరుద్ధంగా అరెస్టు జరిగిన ఈ కేసులో 17Aపై సుప్రీంకోర్టు న్యాయమూర్తులు తమ అభిప్రాయాలు చెప్పారని అచ్చెన్నాయుడు పేర్కొన్నారు. చంద్రబాబుపై పెట్టిన కేసుల్లో ఇప్పటికీ ఒక్క ఆధారం చూపలేదన్నారు. ఈ కేసుల్లో నిధుల దుర్వినియోగం అయినట్లు కానీ పక్కదారి పట్టినట్లు కానీ ఇప్పటికీ నిరూపించలేకపోయారని విమర్శించారు. కేవలం రాజకీయ కక్షతో చంద్రబాబు ప్రతిష్ఠను దెబ్బతీసేందుకు ప్రయత్నించారని దుయ్యబట్టారు. దీంట్లో ఎప్పటికీ సఫలం కాలేరని అచ్చెన్నాయుడు అన్నారు.
పదేళ్లుగా తప్పించుకుంటున్న జగన్ : మంత్రి అంబటి రాంబాబు అప్పుడప్పుడూ నిజాలే చెబుతారనిమాజీ మంత్రి సోమిరెడ్డి చంద్రమోహన్‌రెడ్డి ఎద్దేవా చేశారు. నేరస్థుడిని ఏ న్యాయస్థానం కాపాడదంటూ రాంబాబు చేసిన ట్వీట్‌కు ఆయన కౌంటర్‌ ఇచ్చారు. 32 కేసులు, 16 నెలల జైలు జీవితం, పదేళ్లుగా బెయిల్‌ వీటన్నింటి నుంచి జగన్ తప్పించుకోలేకపోయారన్న విషయాన్ని రాంబాబు చెబుతున్నారని సోమిరెడ్డి ట్వీట్ చేశారు.