Piles of ATM, Aadhaar Cards on the Roadside in Jadcherla : వినియోగదారులకు అందాల్సిన ఆధార్ కార్డులు, ఏటీఎం కార్డులు రోడ్డు పక్కన కుప్పలుతెప్పలుగా పడి ఉన్న ఘటన తెలంగాణలోని మహబూబ్నగర్ జిల్లా జడ్చర్ల పట్టణంలో చోటుచేసుకుంది. జడ్చర్ల-తిమ్మాజిపేట రహదారిలో నాగసాల చెరువు సమీపంలో కట్టలు, కట్టలుగా ఆధార్, ఏటీఎం కార్డులు ఉండడాన్ని గమనించిన కొందరు స్థానికులు రెవెన్యూ సిబ్బందికి సమాచారం అందించారు.
ఘటనాస్థలానికి చేరుకున్న సిబ్బంది వాటిని పరిశీలించారు. పోస్టుల ద్వారా వినియోగదారులకు చేరాల్సిన విలువైన ఏటీఎం కార్డులు, ఆధార్ కార్డులతో పాటు పలు కవర్లు ఉన్నట్టు గుర్తించారు. అనంతరం వాటిని తహసీల్దార్ కార్యాలయానికి తరలించారు. ఈ కార్డులు ఎక్కడి నుంచి వచ్చాయనే విషయంపై అధికారులు ఆరా తీస్తున్నారు.