'మేము బీదవాళ్లం.. అన్ని సరుకులు ఇవ్వండి సారూ'

ration shops not given commodities: సంక్షేమ పథకాల ప్రభుత్వమని ప్రచారం చేసుకుంటున్న వైఎస్సార్సీపీ ప్రభుత్వం రేషన్ దుకాణాల ద్వారా గత ప్రభుత్వాల హయాంలో అందజేసే నిత్యావసర సరుకుల్లో కోత విధిస్తోంది. గతంలో సుమారు 9 రకాల ఆహార పదార్థాలు రేషన్ దుకాణాల్లో ప్రభుత్వం అందజేసేది. ప్రస్తుతం చాలా ప్రాంతాల్లో ఇంటింటికి అందజేసే రేషన్ సరుకుల్లో బియ్యం, పంచదార మాత్రమే అందజేస్తున్నారు. మరికొన్ని చోట్ల కేవలం బియ్యం అందజేసి చేతులు దులుపుకుంటున్నారు.

Government Imposed Cut In Ration Goods : పేదల ఆకలి తీర్చడంలో రేషన్ దుకాణాల పాత్ర కీలకం. రాష్ట్రంలో ఎన్నో కుటుంబాలకు రేషన్ దుకాణాలే జీవనాధారంగా ఉన్నాయి. ప్రధానంగా భూమిలేని పేద కుటుంబాలు, కూలీ పనులు చేస్తూ జీవనాన్ని సాగిస్తున్న కుటుంబాలకు ఆసరాగా నిలిచే చౌకధర దుకాణాలు క్రమంగా కనుమరుగయ్యే పరిస్థితి రాష్ట్రంలో నెలకొంది. ఇంటింటికీ వాహనాలు పెట్టి రేషన్ అందజేస్తున్నా పెద్దగా ఒరిగిందేమీ లేదు. గత ప్రభుత్వాల హయాంలో అందజేసే నిత్యావసర సరుకుల్లో భారీగా కోత పెట్టారు.

రేషన్ సరుకుల్లో కోత :విజయవాడ నగరంలో చాలా ప్రాంతాల్లో కేవలం బియ్యం, అర కేజీ పంచదార మాత్రమే అందజేస్తున్నారు. ఇప్పటికే ఇళ్ల అద్దెలు, పిల్లల చదువులు, నిత్యావసర సరుకులు ధరలు పెరడంతో ఆర్థిక ఇబ్బందులతో సతమతమవుతున్నామని ప్రజలు చెబుతున్నారు. గత టీడీపీ, అంతకముందు కిరణ్ కుమార్ రెడ్డి ముఖ్యమంత్రిగా ఉన్న సమయంలో రేషన్ డిపోల్లో సుమారు 6నుంచి 9 రకాల సరుకులు అందజేసేవారు. వైఎస్సార్సీపీ ప్రభుత్వం వాటిలో కోత పెట్టింది. ముఖ్యమంత్రి జగన్ మోహన్ రెడ్డి చెప్పే సంక్షేమం ఇదేనా అని పేద ప్రజలు ప్రభుత్వాన్ని ప్రశ్నిస్తున్నారు.

ఉపయోగం లేని ఇంటింటికీ రేషన్ వాహనాలు:గతంలో రేషన్ దుకాణాల ద్వారా బియ్యం, కందిపప్పు, పంచదార, గోదుమలు, సబ్బులు, చింతపండు, వంటనూనె వంటి తొమ్మిది రకాల నిత్యావసర సరుకులు అందజేసేవారు. విజయవాడ వంటి నగరాల్లో ఈ తొమ్మిది రకాల సరుకులతో పాటు కూరగాయలు సైతం చౌకధర దుకాణాల్లో అందజేసే వారని నగర ప్రజలు చెబుతున్నారు. ప్రస్తుతం వైఎస్సార్సీపీ ప్రభుత్వం అధికారంలోకి వచ్చిన తర్వాత ఇంటింటికీ రేషన్ వాహనాలు పెట్టి రేషన్ అందజేసినా.. పేదలకు పెద్దగా ఉపయోగం చేకూరడం లేదని చెబుతున్నారు.

ఆకాశాన్ని తాకుతున్న నిత్యావసర సరుకుల ధరలు :తక్కువ ధరలకు అందజేసే నిత్యావసర సరుకుల్లో కోత విధించడం పట్ల ప్రజల నుంచి తీవ్ర వ్యతిరేకత వ్యక్తం అవుతోంది. బయట మార్కెట్లలో నిత్యావసర సరుకుల ధరలు ఆకాశాన్ని అంటుతున్నాయని మహిళలు చెబుతున్నారు. ఇలాంటి సమయంలో ప్రభుత్వం తమని రేషన్ దుకాణాల్లో మరిన్ని సరుకులు అందజేయాల్సింది పోయి గత ప్రభుత్వం అందజేసే సరుకుల్లో కోత విధించడమేంటని వాపోతున్నారు.

ప్రభుత్వాన్ని వేడుకుంటున్న ప్రజలు :ఇప్పటికైనా రాష్ట్రం ప్రభుత్వం స్పందించి రేషన్ దుకాణాల్లో గతం ప్రభుత్వాలు అందజేసిన తొమ్మిది రకాల సరుకులు అందజేయాలని ప్రజలు కోరుతున్నారు.

"మేము బీదవాళ్లం. రేషన్ మీదనే ఆధారపడి బతికేవాళ్లం. గతంలో బియ్యం, చింతపండు, పంచదార, కందిపప్పు అన్ని ఇచ్చేవారు. ప్రస్తుతం కేవలం బియ్యం మాత్రమే ఇస్తున్నారు. మా లాంటి వాళ్లం అన్ని తెచ్చుకుంటాం. అన్ని సరుకులు రేషన్​ దుకాణాల్లో ఇస్తే బాగుంటుంది." విజయవాడ ప్రజలు

ఇవీ చదవండి