Potina Mahesh On Mudragada: 'కాపులకు జగన్​ ఏం చేశారు'.. ముద్రగడను ప్రశ్నించిన పోతిన మహేష్

JanaSena leader Mahesh Fire on Mudragada letter: జనసేన అధినేత పవన్ కల్యాణ్ వ్యాఖ్యలు, సవాళ్లపై ముద్రగడ పద్మనాభం లేఖ విడుదల చేయటాన్ని జనసేన పార్టీ నాయకులు, బీసీ సంఘాల నాయకులు తీవ్రంగా ఖండించారు. ఒక రౌడీ, గూండా, అవినీతిపరుడికి వత్తాసు పలుకుతూ.. ముద్రగడ లేఖను విడుదల చేయటం చాలా దుర్మార్గమన్నారు. ఎదుటివారిని ప్రశ్నించే ముందు జగన్ కాపులకు ఏం చేశారో..? చెప్పాలంటూ హితవు పలికారు.

JanaSena leader Mahesh Fire on Mudragada letter: జనసేన అధినేత పవన్ కల్యాణ్ గతకొన్ని రోజులుగా 'వారాహి విజయ యాత్ర' పేరుతో ఉమ్మడి తూర్పు గోదావరి జిల్లాలో పర్యటిస్తున్న విషయం తెలిసిందే. పర్యటనలో భాగంగా ఆయన.. ముఖ్యమంత్రి జగన్‌, వైఎస్సార్సీపీ ఎమ్మెల్యేలు, మంత్రులపై తనదైన శైలిలో వ్యాఖ్యలు చేస్తున్నారు. అడుగడుగునా అన్ని వర్గాల ప్రజలతో సమావేశమవుతూ, వారి సమస్యలను తెలుసుకుంటూ.. వినతులను స్వీకరిస్తున్నారు. ఈ క్రమంలో పవన్ కల్యాణ్ వ్యాఖ్యలపై, సవాళ్లపై, వారాహి యాత్రలో ఆయన ఉచ్చరిస్తున్న భాషపై కాపు ఉద్యమ నేత ముద్రగడ పద్మనాభం తాజాగా మూడు పేజీల లేఖను విడుదల చేశారు. ఆ లేఖపై జనసేన పార్టీ ముఖ్య నేతలు, కార్యకర్తలు, బీసీ సంఘం నేతలు తీవ్రంగా మండిపడుతున్నారు.

ముద్రగడ లేఖపై పోతిన మహేశ్ ఫైర్..కాపుఉద్యమ నేత ముద్రగడ పద్మనాభం లేఖపై జనసేన పార్టీ విజయవాడ నగర అధ్యక్షులు పోతిన మహేష్ ఘాటుగా స్పందించారు. వైఎస్సార్సీపీ ఎమ్మెల్యేద్వారంపూడి చంద్రశేఖర్ రెడ్డి అనే రౌడీ, గూండా, అవినీతిపరుడికి వత్తాసు పలుకుతూ.. ముద్రగడ లేఖను విడుదల చేయటం చాలా దుర్మార్గమన్నారు. రాష్ట్రాన్ని సర్వ నాశనం చేస్తున్న వైఎస్సార్ కాంగ్రెస్ పార్టీతో ముద్రగడ పద్మనాభం చేతులు కలిపినట్లు చాలా స్పష్టంగా అర్థమవుతుందన్నారు. ద్వారంపూడి చంద్రశేఖర్ రెడ్డిని విమర్శించినా.. పవన్ కల్యాణ్వ్యాఖ్యలపై ముద్రగడ లేఖ విడుదల చేయడాన్ని జనసేన పార్టీ తీవ్రంగా ఖండిస్తుందన్నారు. కాపుల సంక్షేమం కోసం ఏ రోజైనా కనీసం ఒక్క లేఖ అయినా విడుదల చేశారా ముద్రగడ పద్మనాభం..? అని పోతిన మహేష్ ప్రశ్నించారు.

''కేంద్ర ప్రభుత్వం ఇచ్చిన ఈబీసీ రిజర్వేషన్లను కాపులకు 5 శాతం అమలు చేస్తూ.. గత ప్రభుత్వం ఇచ్చిన ఉత్తర్వులను వైఎస్సార్ కాంగ్రెస్ పార్టీ అధికారంలోకి రాగానే రద్దు చేసింది. ఆ రోజున ఎందుకు ప్రశ్నించలేదు ముద్రగడ. వైఎస్సార్సీపీ ప్రభుత్వం కాపులకు ఏ సంక్షేమ పథకాలను అమలు చేస్తుందో ఒక్కటి చెప్పు. బూతులతో అధికార పార్టీ నాయకులు రాష్ట్రంలోని అన్ని వర్గాల ప్రజలపై విరుచుకుపడుతుంటే.. ఆ బూతులు సంగీతంలా వినిపించాయా.. ముద్రగడ పద్మనాభం. కాపు ఉద్యమాన్ని వైఎస్సార్సీపీ అధికారంలోకి వచ్చాక పూర్తిగా పక్కన పెట్టేసింది. పవన్ కల్యాణ్ చేసిన వ్యాఖ్యలపై ముద్రగడ పద్మనాభం ఎందుకు లేఖ విడుదల చేశారో చెప్పాలి''-పోతిన మహేశ్, జనసేన పార్టీ నేత

ముద్రగడ పద్మనాభానికి బుద్ధా వెంకన్న బహిరంగ లేఖ..మరోవైపు తెలుగుదేశం పార్టీ నేత బుద్ధా వెంకన్న ముద్రగడ పద్మనాభంకు బహిరంగ లేఖ రాశారు. కాపులకు జగన్ ప్రభుత్వం ఏమి చేయకపోయినా.. ముద్రగడ ఎందుకు ప్రశ్నించడం లేదని నిలదీశారు. జగన్‌తో..ముద్రగడ పద్మనాభం లాలూచీపడ్డారా..? లేక భయపడుతున్నారా..? అంటూ ప్రశ్నించారు. కాపు ఉద్యమాన్ని అడ్డుపెట్టుకొని చంద్రబాబును విమర్శిస్తే బీసీలుగా తాము చూస్తూ ఊరుకోమని హెచ్చరించారు. ఇకపై ముద్రగడ రాసే ప్రతి లేఖకు బదులిస్తామన్నారు. ఎదుటివారిని ప్రశ్నించే ముందు జగన్ కాపులకు ఏం చేశారో..? వివరించి అప్పుడు ప్రశ్నించాలని బుద్దా వెంకన్న హితవు పలికారు.