corruption in village and ward secretariat system: 3,648 కిలోమీటర్ల పాదయాత్రలో గ్రామాల్లో పరిస్థితులను దగ్గరుండి గమనించా. రేషన్‌ కార్డు, ఇల్లు... చివరకు మరుగుదొడ్డి కావాలన్నా లంచం ఇవ్వందే ఏ పనీ జరగని పరిస్థితిని స్వయంగా నా కళ్లతోనే చూశా. ఇదివరకు మాదిరిగా ఎవరికీ లంచాలు ఇవ్వాల్సిన పని లేదు. మన ప్రభుత్వంలో అలా జరగకూడదని సచివాలయాల వ్యవస్థను తీసుకొచ్చాం. 35 శాఖలకు చెందిన దాదాపు 500 సేవలను ప్రతి ఒక్కరి ముఖంలో చిరునవ్వు కనిపించేలా అందిస్తామని గర్వంగా చెబుతున్నా. ఉద్యోగులెవరైనా లంచాలు అడిగితే ఒక్క ఫోన్‌ కాల్‌ చేస్తే చాలు ప్రభుత్వం వెంటనే స్పందిస్తుంది.- 2019 అక్టోబరు 2న గ్రామ, వార్డు సచివాలయాల వ్యవస్థ ప్రారంభ సభలో సీఎం జగన్‌
ఇదండీ పరిస్థితి..
గుంటూరులో 89వ వార్డు సచివాలయ పరిపాలన కార్యదర్శి షేక్‌ ఆరిఫ్‌ ఈ ఏడాది అక్టోబరు 14న దుర్గానగర్‌కు చెందిన ఎం.నాగభూషణం నుంచి ఆస్తి పన్ను పేరు మార్చడానికి రూ.4వేలు లంచం తీసుకుంటూ అవినీతి నిరోధకశాఖ (అనిశా) అధికారులకు దొరికారు. అనకాపల్లి జిల్లా నాతవరం మండలం మునగపూడి బెన్నవరం గ్రామ సచివాలయం వీఆర్వో సూర్యనారాయణ వ్యవసాయ భూమి మ్యుటేషన్‌, పాస్‌ పుస్తకం ప్రాసెస్‌ చేసేందుకు ఈ ఏడాది సెప్టెంబరు 28న రైతు శ్రీనివాస్‌రెడ్డి నుంచి రూ.20వేలు లంచం తీసుకుంటూ అనిశాకు చిక్కారు.
గ్రామ, వార్డు సచివాలయాల వ్యవస్థలో ముడుపుల పర్వం జోరుగా సాగుతోంది. పైకం చెల్లిస్తే తప్ప ప్రజలకు పౌర సేవలు అందడం లేదు. వివిధ ప్రభుత్వశాఖల అధికారులతో కలిసి సచివాలయాల ఉద్యోగులు లంచాలు వసూలు చేస్తున్నారు. ప్రత్యేకించి పుర, నగరపాలక సంస్థలు, రెవెన్యూశాఖల్లో అక్రమ వసూళ్లు ఎక్కువగా ఉంటున్నాయి. ఈ ఏడాది జనవరి నుంచి ఇప్పటివరకు అనిశా నమోదు చేసిన కేసుల్లో అత్యధికంగా సచివాలయాల్లో లంచాలకు చెందినవి కావడం గమనార్హం. రాష్ట్రంలోని 15,004 గ్రామ, వార్డు సచివాలయాల్లో వివిధ 540 రకాల సేవలను అందిస్తున్నట్లు ప్రభుత్వం గొప్పగా చెబుతోంది. ప్రజల ఇళ్లవద్దే సేవలను అందించే, అవినీతికి ఆస్కారం లేని వ్యవస్థను దేశంలోనే తొలిసారి ప్రారంభించామని సీఎం జగన్‌ నుంచి మంత్రుల వరకు ప్రతి సభలోనూ చెబుతున్నారు. క్షేత్ర స్థాయిలో అందుకు భిన్నమైన పరిస్థితులు కనిపిస్తున్నాయి.
కుల, నివాస, ఆదాయ, కుటుంబ సభ్యుల ధ్రువపత్రాల నుంచి కొత్త ఇళ్లకు ఆస్తి పన్నులు వేసే వరకు అదనపు సొమ్ములివ్వందే పనులు కావడం లేదు. కృష్ణా, గుంటూరు, ఎన్టీఆర్‌ జిల్లాల్లోని వివిధ గ్రామ, వార్డు సచివాలయాలను ‘ఈటీవీ భారత్’ పరిశీలించగా... కొన్నిచోట్ల ఉద్యోగుల అక్రమ వసూళ్లపై ప్రజలు ఫిర్యాదు చేశారు. సచివాలయాల నుంచి వెళ్లే కొన్ని దరఖాస్తులకు మండల, పురపాలక స్థాయిలో లంచాలిస్తేనే పనులు అవుతున్నాయని వారు ఆరోపించారు.
అక్రమ వసూళ్లు ఇలా: కుటుంబ సభ్యుల ధ్రువీకరణ పత్రం (ఫ్యామిలీ సర్టిఫికెట్‌) పొందాలంటే కొన్నిచోట్ల రూ.3వేలు, ఇంకొన్ని ప్రాంతాల్లో రూ.5వేల చొప్పున చెల్లించాల్సి వస్తోంది.