E-Vehicles sales in AP: జోరందుకోవాల్సిన వేళ.. మందగించిన ఎలక్ట్రిక్ వాహనాల విక్రయాలు.. కారణాలు ఇవే!

AP govt not encouraging the purchase of electric vehicles: రోజురోజుకు పెరిగిపోతున్న పెట్రో ధరలతో.. వాహనదారులు, ప్రత్యామ్నాయ మార్గాలను వెతుక్కుంటున్నారు. అలాంటి వారికి ఎలక్ట్రిక్ వాహనాల వారికి దారిని చూపించాయి. మధ్యతరగతి ప్రజలు ఈ వాహనాలపై మక్కువ పెంచుకుంటున్న వేళ.. నిపుణులు, ఆర్ధిక వేత్తలు కూడా రాబోయే రోజుల్లో ఎలక్ట్రిక్ వాహనాలదే హవా అంటున్నారు. ఇంతలా ఆశలు కల్పిస్తున్న ఈ రంగంపై కేంద్ర-రాష్ట్రప్రభుత్వాలు అనుసరిస్తున్న విధానం గొడ్డలి పెట్టులా మారింది. ఎలక్ట్రిక్ వాహనాలపై రాష్ట్రప్రభుత్వం అమాంతం పన్నులు వేసి, వాహనదారుడి నడ్డి విరగ్గొట్టేస్తోంది. ఇంత ఖరీదు పెట్టి ఎందుకు కొనాలి..? అనే పరిస్థితులు దాపురించాయి.

AP govt not encouraging the purchase of electric vehicles: ఇ-మొబిలిటీ విధానంలో భాగంగా ఎలక్ట్రిక్ వాహనాల కొనుగోలు ప్రోత్సహించాల్సిన కేంద్ర, రాష్ట్ర ప్రభుత్వాలు అందుకు విరుద్ధమైన నిర్ణయాలు తీసుకున్నాయి. కేంద్ర ప్రభుత్వం ఫేమ్ 2 రాయితీని ఎత్తివేయటంతో.. ఎలక్ట్రిక్ వాహన తయారీదారులంతా ఆ భారాన్ని వినియోగదారుల నెత్తిపై మోపేశాయి. ఏపీ ప్రభుత్వం కూడా ఎలక్ట్రిక్ వాహనాలపై లైఫ్ ట్యాక్స్ విధిస్తూ నిర్ణయం తీసేసుకుంది. దీంతో సరాసరి ఒక్కో ఎలక్ట్రిక్ వాహనంపైనా రూ. 40 వేల నుంచి రూ. లక్ష వరకూ భారం పడుతోంది. దీంతో ఏపీలో ఎలక్ట్రిక్ వాహనాల విక్రయాలు మందగించాయి.

ఏపీలో మందగించిన ఎలక్ట్రిక్ వాహనాల విక్రయాలు.. ఇ-మొబిలిటీ వాహనాల కొనుగోలును ప్రోత్సహించాల్సిన కేంద్ర, రాష్ట్ర ప్రభుత్వాలు వాటిని నిరుత్సాహ పరిచే నిర్ణయాలు తీసుకుంటున్నాయి. ఎలక్ట్రిక్ వాహనాలకు ఇప్పటి వరకూ కేంద్రం ఇచ్చే ఫేమ్ 2 సబ్సీడీని కేంద్రం ఎత్తివేస్తే.. ఈ మొబిలిటీ వాహనాల రిజిస్ట్రేషన్ ఛార్జీలను రాష్ట్రాలు మళ్లీ విధిస్తూ నిర్ణయం తీసుకున్నాయి. ప్రభుత్వాల నిర్ణయాల మేరకు ఎలక్ట్రిక్ వాహనాల తయారీ సంస్థలు ఆ భారాన్ని యథావిధిగా కొనుగోలు దారుపై మోపేస్తున్నాయి. దీంతో ఒక్కో ద్విచక్రవాహనంపై రూ. 20 నుంచి రూ. 30 వేల మేర, కార్లు ఇతర ఎలక్ట్రిక్ వాహనాలపై రూ. 50 నుంచి రూ. 1 లక్ష మేర అదనపు భారం పడుతోంది.

ఫేమ్ 2 సబ్సీడీని ఎత్తివేసిన కేంద్రం..ఈ నేపథ్యంలో ఎలక్ట్రిక్ వాహనాల ధరలు అమాంతం పెరిగిపోయి కోనుగోలుదారుడ్ని నిరుత్సాహ పరుస్తున్నాయి. దీంతో ఈ ఒక్క నెలలోనే ఎలక్ట్రిక్ వాహనాల విక్రయాలు అమాంతం పడిపోయాయి. ప్రస్తుతం దేశవ్యాప్తంగా 175 రకాల ఎలక్ట్రిక్ వాహనాల మోడళ్లు వినియోగదారులకు అందుబాటులో ఉన్నాయి. కేంద్ర ప్రభుత్వం ఫేమ్ 2 సబ్సీడీని ఎత్తివేయటంతో ఓలా, ఆథర్, ఆరా, హీరో, మోరిసన్ గారేజ్, టాటా మోటార్స్, హుండాయ్ లాంటి వాహన తయారీ సంస్థలు వాహనాలపై ధరల్ని పెంచేశాయి. దీంతో మళ్లీ కొనుగోలు దారులు పెట్రోలు వాహనాల వైపు మొగ్గు చూపక తప్పటం లేదు. దేశవ్యాప్తంగా ఇప్పటి వరకూ 6.44 లక్షల ఎలక్ట్రిక్ వాహనాలు విక్రయాలు జరిగినట్టు కేంద్రం చెబుతోంది. అలాగే, రూ.3,113 కోట్ల రూపాయల ప్రోత్సాహకాలను కూడా ఫేమ్ 2 సబ్సీడి కింద ఇచ్చినట్టు కేంద్ర భారీ పరిశ్రమల శాఖ స్పష్టం చేస్తోంది.

రాయితీ నిలుపుదల-వినియోగదారులు విలవిల.. వాస్తవానికి వాస్తవానికి ఫేమ్ రెండోదశ ప్రాజెక్టు కింద కేంద్ర ప్రభుత్వం మూడేళ్ల కాలానికి గానూ రూ.10 వేల కోట్ల ప్రోత్సాహకాలను అందించాలని లక్ష్యంగా నిర్దేశించింది. దేశంలో ఎలక్ట్రిక్ వాహనాల వినియోగం పెంచేందుకు గానూ ఈ మొత్తాన్ని బడ్జెటరీ సపోర్టుగా కేంద్రం ఇచ్చింది. రెండో దశలో 7 వేల వరకూ ఎలక్ట్రిక్ బస్సులు, 5 లక్షల ఎలక్ట్రిక్ ఆటోలు, 55 వేల ఎలక్ట్రిక్ కార్లు, 10 లక్షల ద్విచక్రవాహనాలు విక్రయాలకు ప్రోత్సాహకాలు ఇవ్వాలని లక్ష్యంగా నిర్దేశించారు. 2024 వరకూ ఈ రాయితీ ఇచ్చేందుకు నిర్దేశించారు. అయితే, కేంద్రం హడావిడిగా 2023 జూన్ 1 తేదీ నుంచే ఫేమ్ 2 రాయితీని నిలుపుదల చేస్తూ నిర్ణయం తీసుకుంది. దీంతో ఎలక్ట్రిక్ వాహన తయారీ దారులంతా ఆ భారాన్ని నేరుగా వినియోగదారులపై మోపేశారు.

ఎలక్ట్రిక్ వాహనాలపై ఏపీలో జీవిత కాల పన్ను.. అటు రాష్ట్ర ప్రభుత్వం కూడా జూన్ 8 తేదీ నుంచి అన్ని ఎలక్ట్రిక్ వాహనాలపై జీవిత కాల పన్నును లక్షకు 12 శాతంగా విధించాలని నిర్ణయిస్తూ ఆదేశాలు కూడా ఇచ్చింది. దీంతో ఎలక్ట్రిక్ ద్విచక్ర వాహనాలు, కార్లు, ఇతర వాహనాలపై నేరుగా రూ.20 నుంచి రూ.40 వేల మేర ధర పెరిగిపోయింది. దీంతో కొనుగోలు దారులు ఎలక్ట్రిక్ వాహనాలంటే సంకోచించాల్సిన పరిస్థితులు నెలకొన్నాయి. కేంద్ర, రాష్ట్ర ప్రభుత్వాల నిర్ణయాల కారణంగా అటు దేశంలోనూ, రాష్ట్రంలోనూ ఎలక్ట్రిక్ వాహనాలకొనుగోళ్లు మందగించినట్టు మార్కెట్ వర్గాలు చెబుతున్నాయి. మళ్లీ వినియోగదారులంతా పెట్రోల్, డీజిల్ వాహనాలపై మొగ్గు చూపుతున్నట్టు స్పష్టమవుతోంది.