Andhra Pradesh Left parties important decision: రాష్ట్ర ప్రభుత్వం తీసుకువచ్చిన జీవో నెంబర్ 1ను రద్దు చేసేంతవరకూ రాష్ట్రవ్యాప్తంగా పెద్ద ఎత్తున పోరాటం చేయాలని రాజకీయ పార్టీలు, ప్రజాసంఘాలు నిర్ణయించారు. మార్చిలో శాసనసభ సమావేశాలు ప్రారంభం కాగానే.. 'చలో అసెంబ్లీ' పేరుతో పెద్ద ఎత్తున నిరసన చేపట్టాలని నిర్ణయించాయి. ప్రతిపక్షాల గొంతు నొక్కేందుకే బ్రిటీష్ కాలం నాటి జీవోలను ప్రభుత్వం తీసుకువచ్చిందని ప్రతిపక్షాల నేతలు ఆక్షేపించారు. అదేవిధంగా పోలీసుల తీరును నేతలు తీవ్రంగా తప్పుపట్టారు. రాష్ట్రంలోని పోలీసులు సీఎం జగన్‌కు జీతగాళ్లుగా మారి పని చేస్తున్నారని.. తీరు మార్చుకోవాలని సూచించారు. జీవోను వెనక్కి తీసుకునే వరకు ఐక్యంగా పెద్ద ఎత్తున పోరాటం చేయాలని నిర్ణయించారు.
బహిరంగ సమావేశాలు, బహిరంగ ప్రదేశాల్లో సభలను నిషేధిస్తూ రాష్ట్ర ప్రభుత్వం జనవరి 2వ తేదీన జీవో నెంబర్ 1 తీసుకువచ్చింది. ఈ క్రమంలో విజయవాడలోని మాకినేని బసవ పున్నయ్య విజ్ఞాన కేంద్రంలో ఈరోజు జీవో నెంబర్ 1ను వ్యతిరేకిస్తూ.. తెలుగుదేశం, కాంగ్రెస్, సీపీఐ, సీపీఎం ముఖ్య నేతలు రాష్ట్ర సదస్సును నిర్వహించారు. వీరితోపాటు పలువురు హైకోర్టు న్యాయవాదులు, పలు కార్మిక, ప్రజా సంఘాల నేతలు కూడా పాల్గొన్నారు. సదస్సులో జీవో నెంబర్ 1 పరిణామాల గురించి, ప్రభుత్వం ప్రతిపక్షాల పట్ల అనుసరిస్తోన్న వైఖరి గురించి సుదీర్ఘంగా చర్చించారు.
అనంతరం ప్రభుత్వం తీసుకొచ్చిన జీవో నెంబర్ 1ను వెంటనే ఉపసంహరించుకోవాలని డిమాండ్ చేస్తూ.. అసెంబ్లీ ముట్టడి చేయాలని సదస్సులో తీర్మానించారు. ముట్టడికి అన్ని పార్టీల, ప్రజా సంఘాల, నేతలు కార్యకర్తలు, ప్రజలు పెద్ద ఎత్తున పాల్గొనాలని నేతలు పిలుపునిచ్చారు. అనంతరం జోవోను రద్దు చేసేలా నూతన గవర్నర్ అబ్దుల్ నజీర్‌‌ను కలిసి చర్యలు తీసుకోవాలని కోరతామన్నారు. రాష్ట్రంలో జీవో నెంబర్ 1 అమలుపై సదస్సు వేదికగా రాజకీయ పార్టీ నేతలు, హైకోర్టు న్యాయవాదులు తీవ్రంగా తప్పు పట్టారు. జీవో నెంబర్ 1 ఇలాగే కొనసాగితే.. వైసీపీ వారు తప్పా, మిగిలిన ప్రజలంతా ముద్దాయిలవుతారని హైకోర్టు సీనియర్ న్యాయవాది సంకర రాజేంద్ర ప్రసాద్ అన్నారు.
ప్రతి రాజకీయ పార్టీ, కార్మిక, కర్షక సంఘాలు ఈ విషయాన్ని సీరియస్‌గా తీసుకుని, జీవో నెంబర్ 1 రద్దు కోసం ఒక మహా ఉద్యమం చేస్తేనే గానీ.. విజయం సాధించగలమన్నారు. ప్రజా పోరాటం చేయడం ద్వారానే ఇలాంటి నియంతృత్వ పోకడలను అడ్డుకోగలమని.. అందుకు 'చలో అసెంబ్లీ' ముట్టడియే ప్రధాన మార్గమని న్యాయవాదులు, నేతలు వ్యాఖ్యానించారు. ఎన్ని అడ్టుంకులు వచ్చినా జీవోను ఉపసంహరించుకునే వరకూ పెద్ద ఎత్తున పోరాటం చేయాలని నిర్ణయించారు.
ఈ సందర్భంగా టీడీపీ ఎమ్మెల్యే గద్దె రామ్మోహన్ మాట్లాడుతూ.. అందరి హక్కులను కూలదోసి, ప్రతిపక్షాల పోరాటాలను అణచివేయడమే లక్ష్యంగా రాష్ట్ర ప్రభుత్వం జీవో 1 పేరుతో నల్ల జీవోను తీసుకు వచ్చిందన్నారు. ఇలాంటి నిర్వీర్యమైన పోలీసు వ్యవస్థను తన 35 ఏళ్ల రాజకీయ జీవితంలో ఎన్నడూ చూడలేదన్నారు. ప్రస్తుతం రాష్ట్ర ప్రగతి శూన్యంగా మారి, ఉనికే నాశనమయ్యే పరిస్థితులు వచ్చాయన్నారు. రాబోయే తరాల కోసం పెద్ద ఎత్తున ఉద్యమం చేసి ప్రజాస్వామ్యాన్ని కాపాడుకోవాలని రామ్మోహన్ వ్యాఖ్యానించారు.