చిన్నబోయిన సీమ గర్జన.. ముందుగానే ముగిసిన సభ

Garjana Sabha: కర్నూలులో న్యాయ రాజధాని ఏర్పాటు సీమ ప్రజల హక్కు అని.. మంత్రులు, వైసీపీ నేతలు ఉద్ఘాటించారు. న్యాయ రాజధానికి అడ్డుపడే వారిని ప్రజలు నిలదీయాలని పిలుపునిచ్చారు. మూడు రాజధానులతోనే రాష్ట్ర సమగ్రాభివృద్ధి సాధ్యమన్న నేతలు.. ఎన్ని అడ్డంకులు ఎదురైనా కర్నూలు జగన్నాథగట్టుపై హైకోర్టు నిర్మించి తీరుతామని ప్రకటించారు.

YSRCP Garjana Sabha: మూడు రాజధానులకు మద్దతు పలకడం సహా కర్నూలు నగరంలో హైకోర్టు ఏర్పాటు చేయాలన్న డిమాండ్లతో.. అధికార వైసీపీ కర్నూలులో రాయలసీమ గర్జన సభ నిర్వహించింది. మంత్రులు బుగ్గన రాజేంద్రనాథ్‌రెడ్డి, పెద్దిరెడ్డి రామచంద్రారెడ్డి, గుమ్మనూరు జయరాం, ఉషశ్రీచరణ్, అంజాద్ బాషా సహా సీమ ప్రాంతానికి చెందిన వైసీపీ ఎమ్మెల్యేలు, విద్యార్థి ఐకాస, రాయలసీమ ఐకాస నాయకులు, న్యాయవాదులు పాల్గొన్నారు.

కర్నూలుకు హైకోర్టు రాకుండా చంద్రబాబు అడ్డుకుంటున్నారంటూ.. మంత్రులు తీవ్ర విమర్శలు గుప్పించారు. అన్ని ప్రాంతాల అభివృద్ధి కోసమే సీఎం మూడు రాజధానులు తలపెట్టినట్లు చెప్పారు. వెనుకబడిన న్న సీమ ప్రాంతానికి హైకోర్టుతోనే న్యాయం జరుగుతుందన్నారు. వికేంద్రీకరణతోనే అభివృద్ధి జరుగుతుందని మంత్రి పెద్దిరెడ్డి రామచంద్రారెడ్డి అన్నారు. కర్నూలు పేరును సినిమాల్లో వాడుకుని వేల కోట్లు సంపాదించిన సినీ పరిశ్రమ... హైకోర్టు ఏర్పాటుకు మద్దతివ్వాలని మరో మంత్రి జయరామ్ డిమాండ్‌ చేశారు.

వికేంద్రీకరణను సీమ ప్రజలు బలంగా కోరుకుంటున్నారనే సందేశాన్ని గర్జన సభతో చాటిచెప్పాలని.. మంత్రులు, నేతలకు వైసీపీ అధిష్టానం నిర్దేశించింది. ఈమేరకు జనసమీకరణకు మంత్రులు, నాయకులు తీవ్రంగా శ్రమించారు. వారికి అధికార యంత్రాంగం, పోలీసులు కూడా తమవంతు సహకరించారు. అయినా.. సీమ గర్జనకు పెద్దగా స్పందన కనిపించలేదు.

సచివాలయ సిబ్బంది, ప్రైవేటు విద్యాసంస్థల యాజమాన్యాలు, డ్వాక్రా సంఘాలకు టార్గెట్లు ఇచ్చి మరీ విద్యార్థులను తీసుకొచ్చినా.. ఎండ తీవ్రతకు వాళ్లంతా సభ మధ్యలోనే వెళ్లిపోయారు. మంత్రులు ప్రసంగిస్తుండగానే చాలావరకు కుర్చీలు ఖాళీ అయ్యాయి. పరిస్థితిని గమనించిన మంత్రులు.. సభను త్వరగా ముగించేశారు.

ఇవీ చదవండి: