చౌక ధరల దుకాణాలపై అధికారుల దాడులు.. అజ్ఞాతంలో డీలర్లు

పాలకుర్తి గ్రామంలో విజిలెన్స్​ అధికారులు చౌక ధరల దుకాణాలపై దాడులు నిర్వహించారు. అక్రమంగా నిల్వ ఉన్న సరుకులను గుర్తించారు. దుకాణాలపై కేసులు నమోదు చేశామని విజిలెన్స్​ ఎంపీడీవో తెలిపారు.

కర్నూలు జిల్లా కోడుమూరు మండలం పాలకుర్తి గ్రామంలో రీజనల్ విజిలెన్స్ ఎన్​ఫోర్స్​మెంట్ బృందం... చౌక ధరల దుకాణాలపై దాడులు చేసింది. విజిలెన్స్ అధికారులు వచ్చిన విషయం ముందుగానే తెలుసుకున్న కొందరు డీలర్లు వెంటనే దుకాణాలకు తాళాలు వేసుకుని అజ్ఞాతంలోకి వెళ్లిపోయారు. 39వ దుకాణంలో విజిలెన్స్ ఎంపీడీవో లలితా బాయ్ సరుకుల నిల్వలను పరిశీలించారు. 5 క్వింటాళ్ల రేషన్ బియ్యం, 88 కిలోల కంది బేడలు అక్రమంగా నిల్వ ఉన్నట్లు గుర్తించారు. ఈ మేరకు దుకాణం పై కేసు నమోదు చేసినట్లు అధికారిని తెలిపారు.

అనంతరం మరో నాలుగు ప్రభుత్వ చౌక ధరల దుకాణాలకు తాళాలు వేసి ఉండటంతో విజిలెన్స్, రెవెన్యూ సిబ్బంది అక్కడ తిష్ఠ వేశారు. ప్రభుత్వ చౌక ధరల దుకాణం దగ్గర ఓ ఇంట్లో 77 సంచుల పీడీఎఫ్ బియ్యాన్ని సైతం అధికారులు గుర్తించారు. ఈ మేరకు అధికారులు మూతపడ్డ దుకాణాలకు తమ దగ్గర ఉన్న తాళాలు వేసి నిఘా పెట్టారు. అన్ని దుకాణాలకు సంబంధించిన డీలర్లు అందుబాటులోకి వచ్చిన తర్వాత... ఏ మేరకు సరుకులు నిల్వ ఉన్నాయో తదితర పూర్తి వివరాలను వెల్లడిస్తామని విజిలెన్స్ ఎంపీడీవో పేర్కొన్నారు.

ఇదీ చదవండి: