కాటికి చేరే దాకా కంటికి రెప్పలా చూసుకోవాల్సిన కన్నకొడుకు కాదు పొమ్మన్నాడు. దిక్కుతోచని వృద్ధ దంపతులు రోడ్డునపడ్డారు. చలికి వణుకుతూ బతుకుతున్న ఆ వృద్ధ దంపతులను చూస్తే మనసు కలిచివేయక మానదు. రెండెకరాల పొలం, ఇల్లు ఉన్నా.. రోడ్డునపడ్డ ఈ దంపతులను చూసి స్థానికులు చలించిపోతున్నారు. కానీ కర్కశ కొడుకు మనసు మాత్రం కరగడం లేదు.
తెలంగాణ రాష్ట్రం జోగులాంబ గద్వాల జిల్లా రాజోలి గ్రామానికి చెందిన బత్కన(75), బతుకమ్మ(65) భార్యాభర్తలు. వీరికి నలుగురు సంతానం. ముగ్గురు కూతుళ్లు, ఒక కొడుకు. దంపతుల పేరుపై రెండు ఎకరాల పొలం, ఒక ఇల్లు ఉన్నాయి. ఆస్తిని అనుభవిస్తున్న కుమారుడు తల్లిదండ్రులను ఇంట్లో నుంచి వెళ్లగొట్టాడు. నిత్యం తమను బయటకు వెళ్లిపోవాలని రోజూ కొడుకు, కోడలు హింసించేవారని వృద్ధులు కన్నీరు మున్నీరయ్యారు.
తాము పోలీస్ స్టేషన్ వెళ్లి ఫిర్యాదు చేసినా.. కుమారుని తీరులో మార్పు రాలేదని వాపోయారు. చివరకు పెద్దమనుషుల దగ్గర పంచాయితీ చేసి అద్దె ఇంట్లో పెట్టడానికి ఒప్పుకున్నాడని తెలిపారు. అద్దె ఇల్లు యజమానిని కూడా తమ కొడుకు భయభ్రాంతులకు గురిచేసి తమను ఖాళీ చేయించాడని ఆవేదన వ్యక్తం చేశారు.