గాజులదిన్నెకు జలకళ... ఈసారైనా తీరేనా రైతు కల..?

కొన్నేళ్లుగా నీరు లేక వెలవెలబోయిన గాజులదిన్నె ప్రాజెక్టు జలకళను సంతరించుకుంది. ఇటీవల కురిసిన వర్షాలకు భారీగా నీరు చేరి... నిండుకుండను తలపిస్తోంది. మూడేళ్లుగా... తాగునీటి అవసరాలకు మాత్రమే పరిమితమైన ఈ ప్రాజెక్టు నుంచి... ఈ ఏడాదైన సాగు అవసరాలకు నీరు విడుదల చేస్తారని రైతులు ఆశాభావం వ్యక్తం చేస్తున్నారు.

కర్నూలు జిల్లా గోనెగండ్ల మండలంలోని గాజులదిన్నె ప్రాజెక్టు ద్వారా... డోన్ మున్సిపాలిటీతో పాటు కృష్ణగిరి, పత్తికొండ మండలాల్లోని సుమారు 100 గ్రామాలకు తాగునీరు సరఫరా చేస్తున్నారు. రబీలో సుమారు 24వేల ఎకరాలకు సాగునీరు అందించాలి. మూడేళ్లుగా సరైన వర్షాలు లేక... ఈ ప్రాజెక్టు తాగునీటి అవసరాలకే పరిమితమైంది. ఆయకట్టు రైతులకు సాగునీరు అందక నష్టపోయారు.

ఇటీవల కురిసిన వర్షాలకు గాజులదిన్నె ప్రాజెక్టుకు భారీగా నీరు వచ్చింది. ఇప్పటికే 3 టీఎంసీల నీరు చేరింది. ఎగువ నుంచి వరద ఇంకా వస్తుండటంతో... ప్రాజెక్టు పూర్తిస్థాయి సామర్థ్యానికి చేరుకునే అవకాశాలు మెండుగా ఉన్నాయని అధికారులు చెబుతున్నారు. మూడేళ్లుగా పంటలు ఎండిపోయి తీవ్రంగా నష్టపోయామని... కనీసం ఈ ఏడాదైనా సాగునీరు ఇవ్వాలని ఆయకట్టు రైతులు కోరుతున్నారు.