TG COMMENTS: 2015 ఒప్పందం కాదంటే..రాష్ట్ర విభజనను ఒప్పుకోం: టీజీ

తెలంగాణ ముఖ్యమంత్రి కేసీఆర్ ఆయన మంత్రులు రోజుకో మాట మాట్లాడుతున్నారని.. కేవలం హుజూరాబాద్ ఉపఎన్నికల కోసం జలవివాదం తెరపైకి తీసుకొచ్చారని ఎంపీ టీజీ వెంకటేశ్ ఆరోపించారు. కేసీఆర్ ఆమోదంతోనే 2015 ఒప్పందంపై 2 రాష్ట్రాలు సంతకాలు చేశాయన్న టీజీ.. ఆ ఒప్పందం కాదంటే మేం కూడా రాష్ట్రవిభజన ఒప్పుకోమని స్పష్టం చేశారు.

తెలుగు రాష్ట్రాల మధ్య నెలకొన్న జల వివాదం నేపథ్యంలో తెలంగాణ ముఖ్యమంత్రి కేసీఆర్​పై ఎంపీ టీజీ వెంకటేశ్ మండిపడ్డారు. కృష్ణా జలాలపై కేసీఆర్ ఆయన మంత్రులు​ రోజుకోమాట మాట్లాడుతున్నారని ఆరోపించారు. కేవలం హుజూరాబాద్ ఉపఎన్నికల కోసం జలవివాదం తెరపైకి తీసుకొచ్చారని ఆరోపించారు.

శ్రీశైలం ప్రాజెక్ట్ విద్యుత్‌ ఉత్పత్తి కోసమే అంటున్న తెలంగాణ నాయకులు.. మరి ఇన్ని రోజులు ఇరిగేషన్ కోసం ఎందుకు వాడుకున్నారని నిలదీశారు. కేసీఆర్ ఆమోదంతోనే రెండు రాష్ట్రాల మధ్యం 2015లో ఒప్పందం జరిగిందని ఆయన గుర్తుచేశారు. ఆ అగ్రిమెంట్ కాదంటే మేం తిరిగి సమైక్యాంధ్ర ఉండాలని కోరుతామన్నారు.

రాష్ట్రానికి చెందిన జలాల విషయంలో రాష్ట్ర నాయకులంతా ఒకే తాటిపై నడవాలని హితవు పలికారు. రాయలసీమ జలాలపై రెండు, మూడు రోజుల్లో సమావేశం నిర్వహించి నిర్ణయం తీసుకుంటామన్నారు.

ఇదీ చదవండి..