కర్నూలు జిల్లాలోని ఆదోని - పత్తికొండ ఆర్టీసీ బస్సులో గత నెల 13న జరిగిన దొంగతనం కేసులో ఓ మహిళను పోలీసులు అరెస్ట్ చేశారు. తుగ్గలి మండలం రాతన గ్రామానికి చెందిన మహిళ ఆదోని వైపు వెళ్తుండగా చోరీ జరిగింది. ఆస్పరి గ్రామంలో గుర్తు తెలియని మహిళ... బాధితురాలి పక్కనే కూర్చున్న తర్వాత ఘటన జరిగినట్టు పోలీసులు గుర్తించారు.
కేసు నమోదు చేసిన దర్యాప్తు చేసిన పోలీసులు.. ఇద్దరు మహిళలు దొంగతనం చేసినట్లు దర్యాప్తులో తేల్చారు. వారిలో ఇప్పటికే ఒకరిని అదుపులో తీసుకొని చోరీని నిర్థరించారు. ఆమె నుంచి రూ. 2.53 లక్షల విలువైన 53 గ్రాముల బంగారం రికవరీ చేశారు. మరో మహిళ పరారీలో ఉందని డీఎస్పీ వినోద్ కుమార్ తెలిపారు.