మాజీ మంత్రి భూమా అఖిలప్రియ సోదరుడిపై కేసు నమోదు

మాజీ మంత్రి భూమా అఖిల ప్రియ సోదరుడు భూమా జగద్విఖ్యాత రెడ్డిపై ఆళ్లగడ్డ పట్టణ పోలీస్ స్టేషన్​లో కేసులు నమోదయ్యాయి. ఓ కేసులో నిందితుడిగా ఉన్న వ్యక్తిని పోలీసుల అనుమతి లేకుండా ఆళ్లగడ్డ పట్టణ పోలీస్ స్టేషన్​లో నుంచి బలవంతంగా విడిపించుకొని వెళ్లటంతో కేసు నమోదైంది.

కర్నూలు జిల్లా ఆళ్లగడ్డ పురపాలిక పరిధిలోని పడకండ్ల గ్రామంలో తెదేపా మాజీ కౌన్సిలర్ నరసింహుడుపై ఓ ఘటనలో కేసు నమోదైంది. కేసుకు సంబంధించి అతడిని పోలీసులు అదుపులోకి తీసుకుని స్టేషన్​కు తరలించారు. సమాచారం అందుకున్న మాజీ మంత్రి భూమా అఖిలప్రియ సోదరుడు జగద్విఖ్యాత రెడ్డి తన అనుచరులతో పోలీసు స్టేషన్​కు చేరుకొని నిందితుడుని బలవంతంగా విడిపించుకొని తీసుకెళ్లాడు. ఘటనపై సమాచారం అందుకున్న ఉన్నతాధికారులు... పోలీసు విధులకు ఆటంకం కలిగించినందుకు పలు సెక్షన్ల కింద కేసులు నమోదు చేయాలని సీఐ సుబ్రహ్మణ్యాన్ని ఆదేశించారు. ఈ క్రమంలో పోలీసులు కేసులు నమోదు చేశారు.