సైబర్​ నేరగాళ్ల కొత్త ట్రిక్కులు.. లింకు ఓపెన్​ చేస్తే ఖాతా ఖాళీ

టెక్నాలజీ ఎంత వేగంగా పెరుగుతుందో మోసాలు కూడా అన్నే విధాలుగా పెరుగుతున్నాయి. కర్నూలులో కేవైసీ అప్డేట్​ చేసుకోండి అంటూ వచ్చిన లింకులు ఓపెన్​ చేసిన ఓ వ్యక్తి ఖాతా నుంచి లక్షన్నరకు పైగా కాజేశారు. దీంతో బాధితుడు పోలీసులను ఆశ్రయించాడు.

ఏవైనా అప్డేట్ చేసుకోవాలని మీ చరవాణికి సందేశం వస్తే అలాంటి లింకులను ఓపెన్​ చేయొద్దని కర్నూలు పోలీసులు హెచ్చరిస్తున్నారు. తొందరపాటుతో అలాంటి సందేశాలతో పంపిన లింకులను ఓపెన్ చేస్తే క్షణాల్లో బ్యాంకు ఖాతాల్లో డబ్బులు మాయమవుతాయని హెచ్చరిస్తున్నారు.

కర్నూలు జిల్లా నంద్యాల ములసాగరానికి చెందిన సిద్దయ్య అనే వ్యక్తి చరవాణికి కేవైసీ కాలం చెల్లింది అప్డేట్​ చేసుకోవాలని సందేశం వచ్చింది. అప్డేట్​ చేసేందుకు లింక్​ ఓపెన్ చేయడంతో ఖాతాలో ఉన్న రూ.లక్షా 60 వేల 840 రూపాయలు విత్​డ్రా అయ్యాయి. ఖాతాలో మొత్తం రూ.6 లక్షలు ఉండటం వల్ల అవి కూడా మాయమవుతాయని భావించిన సిద్దయ్య మూడో పట్టణ పోలీసులకు ఫిర్యాదు చేశాడు. భాదితుడి ఫిర్యాదు మేరకు పోలీసులు కేసు నమోదు చేసి దర్యాప్తు చేస్తున్నారు.

ఇవీ చూడండి...