అర్హులందరికి ఇళ్లు అన్న పథకంలో .. లబ్ధిదారులకు నిరాశే మిగులుతోంది. జాబితాలో మొదటిసారి వారి పేర్లు కనిపించినా..రెండోసారి అస్సలూ ఆ ఊసే లేదు. ఏళ్లతరబడి అద్దె ఇంట్లో ఉంటూ జీవనం సాగిస్తున్న..వారిని పట్టించుకున్నా నాథుడే కనిపించడం లేదు.
అనుకూలమైన వారి పేర్లు చేర్చుతున్నారు..!
అర్హులైన పేదలకు ఇళ్ల పట్టాలిచ్చే కార్యక్రమం కర్నూలు జిల్లాలో గతేడాది డిసెంబరు 25న ప్రారంభమైంది. జిల్లాలో మొత్తం 1,008 లే-అవుట్లు వేశారు. వీటిలో కోర్టు కేసుల్లో ఉన్న 28 లే-అవుట్ల పరిధిలో 12,244 మంది లబ్ధిదారులకు ఇంకా పంపిణీ చేయాల్సి ఉంది. ఎలాంటి కోర్టు కేసులు లేనివి జిల్లా అంతా 980 లే-అవుట్లు ఉన్నాయి. వీటికి సంబంధించి 1,61,237 పట్టాల పంపిణీ జరుగుతోంది. కరోనాకు ముందు అర్హులైన జాబితా సిద్ధం చేశారు. అయితే కరోనా తర్వాత అధికార పార్టీ నేతలు అధికారులు, సిబ్బందిపై ఒత్తిడి తెచ్చి కొందరి పేర్లు తీయించి, అనుకూలమైన వారి పేర్లు జాబితాలో చేర్చారు. చాలా చోట్ల గ్రామసభలు పెట్టకుండానే వైకాపా నాయకులిచ్చిన జాబితానే తుదిజాబితాగా సిద్ధం చేసినట్లు తెలుస్తోంది.
ఒకే ఇంటిలో 2-3 పట్టాలు
జిల్లాలో పాణ్యం, ఛాగలమర్రి, ఆళ్లగడ్డ, నందికొట్కూరు, ఆదోని, పత్తికొండ, కర్నూలు, ఆలూరు పరిధిలో ఉద్యోగాలున్న కుటుంబాలకు, స్థలాలు, పక్కా ఇళ్లు ఉన్న వారికి, ఒకే రేషన్‌కార్డుపై రెండు, ఒకే ఇంటిలో 2-3 పట్టాలు ఇలా నిబంధనలకు విరుద్ధంగా ఇస్తున్నారు. 65, 72 ఏళ్ల వృద్ధులకు సైతం అర్హుల జాబితాలో చోటు కల్పించారు.