హైవే దోపిడి.. ఇద్దరు నిందితుల అరెస్ట్

కర్నూలు జిల్లా వెల్దుర్తి జాతీయ రహదారిపై ఈ నెల 5న జరిగిన దారి దోపిడీని పోలీసులు ఛేదించారు. దోపిడీకి పాల్పడిన వారిలో ఇద్దరిని అదుపులోకి తీసుకున్నారు. మిగిలిన వారికోసం ముమ్మర గాలింపు చర్యలు చేపట్టినట్లు డోన్ డీఎస్పీ నరసింహారెడ్డి తెలిపారు.

కర్నూలు జిల్లా వెల్దుర్తి జాతీయ రహదారిపై ఈ నెల 5న దోపిడీ జరిగింది. ఈ కేసుకు సంబంధించి ఇద్దరు నిందితులను పోలీసులు అరెస్ట్ చేశారు. వారు ఉపయోగించిన స్విఫ్ట్ కారు, చోరీ చేసిన 3 చరవాణులు, రూ.1500 నగదు స్వాధీనం చేసుకున్నారు.

5వ తేదీ రాత్రి 12.30 గంటలకు వెల్దుర్తి జాతీయ రహదారిపై సూదేపల్లి వద్ద ఈ ఘటన జరిగింది. హైదరాబాద్ నుంచి బెంగళూరు వెళ్తున్న ఓ కారును, స్విఫ్ట్ కారులో ఏడుగురు వ్యక్తులు వెంబడించారు. సూదేపల్లి స్టేజ్ వద్దకు రాగానే ముందున్న కారును ప్లాన్ ప్రకారం స్విఫ్ట్ ​కారు ఢీకొట్టింది. ముందు కారులోని వ్యక్తులు దిగి, ప్రశ్నిస్తుండగా.. దుండగులు వారిపై దాడి చేసి రూ.10 వేల నగదు, 3 చరవాణులు అపహరించారు.

ఈ ఘటనపై బాధితులు 6వ తేదీన వెల్దుర్తి పోలీసు స్టేషన్​లో ఫిర్యాదు చేశారు. కేసు నమోదు చేసి, దర్యాప్తు ప్రారంభించిన పోలీసులు నిందితులలో ఇద్దరిని అరెస్ట్ చేశారు. మరో ఐదుగురి కోసం గాలింపు జరుగుతోందని డోన్ డీఎస్పీ నరసింహారెడ్డి తెలిపారు. నిందితులను హైదరాబాద్​కు చెందినవారిగా గుర్తించి.. కోర్టులో హాజపరిచారు.

ఇదీ చదవండి:

అన్నదమ్ముల మధ్య.. పొలం పంపకం చిచ్చు