కష్టాల చెరలో ఉన్న ఆ ఇమామ్​బీకి అందెను బాసట..!

ఇరవై ఏళ్లొచ్చినా అడుగు ముందుకు వేయని బిడ్డలు.. కదల్లేని స్థితిలో మంచం పట్టిన తల్లిదండ్రులు... ఎటూ చాలని ఆర్థికవనరులు. వీరందరికీ ఒకరి ఆదాయమే ఆసరా. ఫలితంగా కష్టాల్లోనే కొట్టుమిట్టాడుతోంది కర్నూలు జిల్లాలో ఓ కుటుంబం. తన ఇద్దరు బిడ్డలతో పాటు తనను కన్నవారినీ ఆమె అమ్మై... కన్నీళ్లు తుడుస్తోంది. కూలీనాలీ చేస్తూ కంటికి రెప్పలా కాపాడుకుంటోంది.

పేదరికంలో నలిగే కుటుంబాల జీవనం గడవాలంటే... ఇంటికి కనీసం ఇద్దరు ముగ్గురైనా రెక్కలు ముక్కలు చేసుకోక తప్పదు. అలాంటిది... నలుగురిని ఒక్కరే పోషించాల్సి వస్తే ఆ కుటుంబ కష్టాలు ఎలా ఉంటాయో ఊహించగలమా. అలాంటి ఘోష పడుతోందీ కర్నూలు జిల్లా తుగ్గలి మండలం గిరిగట్లకు చెందిన ఇమామ్‌బీ. తనను కన్నవారినీ... తాను జన్మనిచ్చిన వారినీ అమ్మై సాకుతోంది. ఆర్థిక కష్టాల చెరలో నలుగుతోంది.

కోటి ఆశలతో అత్తారింటికి...కానీ..!

ఇమామ్‌బీకి 22 ఏళ్ల కిందట వివాహమైంది. కోటి ఆశలతో అత్తారింటి గడప తొక్కిన ఈమెకు... ఇద్దరు సంతానం. కొన్నాళ్లకే భర్త ఖలీల్ చనిపోయాడు. అక్కడి నుంచి ఆమె పడని పాట్లు లేవు. చేతికందొచ్చి కష్టాల కడలిని దాటిస్తారునుకున్న పిల్లల్ని నరాల బలహీనత కదలనీయడం లేదు. కూలినాలి చేసుకొని కుటుంబాన్ని పోషించుకునే ఇమామ్‌బీ మదిలోనూ కష్టాలే మెదిలాయి. బిడ్డలతో పాటు తననూ ఆదరిస్తారని పుట్టింటికి వస్తే... అక్కడా అవే కష్టాలు స్వాగతం పలికాయి.

తల్లి రసూల్‌బీ పక్షవాతంతో మంచం పట్టింది. తండ్రీకూతుళ్లు కూలి పనులతో కుటుంబాన్ని పోషించుకునేవారు. ఒకరోజు రసూల్‌బీకి సేవలు చేస్తూ కాలువిరిగిన ఇమామ్‌బీ తండ్రి రాజాసాహెబ్ కదల్లేని పరిస్థితిలో ఉన్నాడు. ఫలితంగా తన పిల్లలతో పాటు... తన తల్లిదండ్రులనూ పోషించాల్సి వస్తోంది. తనకున్న అరకొర ఆర్థికవనరులతోనే... 20 ఏళ్లొచ్చినా కనీసం కూర్చోలేని పిల్లలకు, వయసు మీద పడిన తల్లిదండ్రులకు సేవలందిస్తోంది. ఇమామ్‌బీ పరిస్థితిని చూసి స్థానికులు ఆవేదన వ్యక్తం చేస్తున్నారు.

ఈనాడు కథనానికి స్పందన..

ఇమామ్‌బీ కష్టాలపై సోమవారం ఈనాడులో... తను కన్నవారికీ, తనను కన్నవారికీ... తనే అమ్మ అనే శీర్షికతో ప్రచురితమైన కథనానికి అధికారులు స్పందించారు. తుగ్గలి ఎంపీడీవో వీర్రాజు ఈ కుటుంబాన్ని పరామర్శించారు. ఇప్పటికే ఇమామ్‌బీకి వితంతు పింఛన్‌, ఇద్దరు పిల్లలకు దివ్యాంగుల పింఛన్ వస్తుండగా.... ఆమె తల్లిదండ్రులకూ పింఛన్ ఇప్పిస్తామని అధికారులు చెప్పారు.

ఇదీ చదవండి : పౌరసత్వ సవరణ బిల్లుకు మద్దతు వెనుక రాజకీయ వ్యూహం!