పైకప్పులేని పాఠశాల... ఎండవేళ విద్యార్థుల అవస్థలు

పైకప్పు లేకుండా.. పాడుబడ్డ బంగ్లాను తలపిస్తున్నది ఓ పాఠశాల. ఇందులోనే విద్యార్థులు అవస్థలు పడుతూ చదువుకుంటున్నారు. అక్షరాలపై దృష్టిపెట్టాల్సిన వారు.. బిక్కుబిక్కుమంటూ పాఠాలు వింటున్నారు. ఇది కర్నూలు జిల్లాలోని ఓ ప్రాథమిక పాఠశాల దుస్థితి.

కర్నూలు జిల్లా ఆస్పరి మండలం యాటకల్లు పంచాయతీ మజ్రా గ్రామం కలపరి ప్రాథమిక పాఠశాల పాడుబడ్డ బంగ్లాను తలపిస్తుంది. ఈ బడిలో రెండు గదులే ఉన్నాయి. అవీ శిథిలావస్థకు చేరుకోవడంతో ‘నాడు-నేడు’లో పనులు చేయాలని గత జూన్‌లో ఓ గది పైకప్పును గుత్తేదారులు తొలగించారు. నిధులు రాక.. అలాగే వదిలేశారు. మిగిలిన ఒక్క గదిలోనే విద్యార్థులంతా చదువుకోవాల్సిన దుస్థితి ఏర్పడింది. ఆ గదిలోనూ పైకప్పు పెచ్చులూడి పడుతున్నాయి. ఎండవేళ పైకప్పు లేని వరండాలో విద్యార్థులు తీవ్ర ఇబ్బందులను ఎదుర్కొంటున్నారు.

ఇదీ చదవండి:ఇరుకు గదుల్లో చదువులు సాగేదెలా!