లాక్​డౌన్ నిబంధనలు కఠినతరం: జిల్లా కలెక్టర్

కర్నూలులో కరోనా కేసులు పెరుగుతున్నందున లాక్​డౌన్​ను కఠినతరం చేస్తున్నట్లు కలెక్టర్ వీరపాండియన్ స్పష్టం చేశారు. నేడు జిల్లాలో కొత్తగా 7 కేసులు నమోదయ్యాయని తెలిపారు.

కర్నూలు జిల్లాలో కరోనా వైరస్‌పై ప్రజలు అప్రమత్తంగా ఉండాలని జిల్లా కలెక్టర్ వీరపాండియన్ సూచించారు. జిల్లాలో కేసులు ఎక్కువగా నమోదవుతున్నందున లాక్ డౌన్‌ని కఠినంగా అమలు చేస్తున్నామన్నారు. ఈ రోజు జిల్లాలో కొత్తగా ఏడు కేసులు నమోదయ్యాయని.. వీటిలో కర్నూలులో రెండు, నంద్యాలలో రెండు, మహానంది మండలంలో రెండు, ఆదోనిలో ఒకటి నమోదైనట్లు తెలిపారు.

కరోనా నుంచి కోలుకుంటున్న వారి సంఖ్య క్రమంగా పెరుగుతుందని ప్రజలు బయపడాల్సిన అవసరం లేదన్నారు. వ్యాధి లక్షణాలు ఉంటే పరీక్షలు నిర్వహించుకోవాలని కోరారు. ఈ రోజు డిశ్చార్జ్​ అయిన వారిలో 14 నెలల చిన్నారితో పాటు 80 సంవత్సరాల వృద్ధుడు కూడా ఉన్నట్లు తెలిపారు. విశాఖ ఘటన నేపథ్యంలో జిల్లాలోని పరిశ్రమలను ప్రత్యేక బృందాలు తనిఖీ చేస్తున్నాయన్నారు.