ప్యాపిలిలో గుర్రంతో కరోనాపై అవగాహన కార్యక్రమం
కరోనా ఆంక్షల కారణంగా.. లాక్డౌన్ అమలులో ఉన్న నేపథ్యంలో ప్రజలు ఇళ్ల నుంచి బయటకు రాకుండా ఉండేందుకు వివిధ పద్ధతుల్లో పోలీసులు అవగాహన కార్యక్రమాలు చేపడుతున్నారు. కర్నూలు జిల్లా ప్యాపిలి పట్టణంలో ఓ పోలీసు.. వినూత్నంగా అవగాహన కల్పించారు. కరోనా వైరస్ చిత్రాలున్న గుర్రంపై ఎస్సై మారుతి శంకర్ కూర్చొని... ప్రజలకు వైరస్ వ్యాప్తిని వివరించారు. కరోనా.. గుర్రం స్వారీ కంటే వేగవంతమైనదని.. ఆ వేగాన్ని అదుపు చేయడానికి లాక్డౌన్ను తప్పనిసరిగా పాటించాలని కోరారు. అవసరం ఉంటే తప్ప ఇంట్లో నుంచి ఎవరు బయటకు రావద్దని కోరారు. చౌక దుకాణాల వద్ద సామాజిక దూరం పాటించాలని చెప్పారు. ఈ విషయాలన్నీ.. గుర్రంపై తిరుగుతూ పట్టణ ప్రజలకు అవగాహన కల్పించారు.