శ్రీశైలం టికెట్ల అక్రమాలపై దర్యాప్తు వేగవంతం

ప్రముఖ శైవ క్షేత్రం శ్రీశైలం దేవస్థానం టికెట్ల అక్రమాలపై దర్యాప్తు వేగవంతం అయ్యింది. ఈ వ్యవహారంపై దేవాదాయశాఖ అదనపు కమిషనర్ రామచంద్రమోహన్​ను విచారణాధికారిగా ప్రభుత్వం నియమించింది. ఆయనకు అన్ని విధాలా సహాయ సహకారాలు అందించాలని దేవాదాయశాఖ కమిషనర్ అర్జునరావు... శ్రీశైలం ఈవోను ఆదేశించారు. కర్నూలు ఎస్పీ ఫక్కీరప్ప ఈ వ్యవహారంపై పూర్తిస్థాయిలో దర్యాప్తు చేపట్టాలని.. ఆత్మకూరు డీఎస్పీ వెంకట్రావును ప్రత్యేకాధికారిగా నియమిస్తూ... ఉత్తర్వులు జారీ చేశారు.

శ్రీశైలం దేవస్థానంలో... దర్శనం, అభిషేకం టిక్కెట్ల సొమ్మును అక్రమార్కులు పక్కదారి పట్టించినట్లు ప్రాథమికంగా అధికారులు గుర్తించారు. కంప్యూటర్ సాఫ్ట్​వేర్​ను మార్చి... మూడేళ్ల వ్యవధిలో కోటీ 42 లక్షల రూపాయలు స్వాహాచేసినట్లు తేల్చారు. ఈ వ్యవహారంలో లోతైన విచారణ జరిగితే మరిన్ని అక్రమాలు వెలుగు చూసే అవకాశం ఉన్నట్లు దేవస్థానం ఈవో రామారావు తెలిపారు. ఇప్పటికే ఆలయ అధికారులు శ్రీశైలం పోలీసులకు ఫిర్యాదు చేశారు. ఇందులో నిందితులుగా భావిస్తున్న 20 మందిపై మోసం, ఐటీ చట్టం కింద కేసులు నమోదు చేశారు.

దేవాదాయశాఖ అదనపు కమిషనర్ రామచంద్రమోహన్ కమిటీ... సాంకేతిక పరిజ్ఞానాన్ని వినియోగించుకుని మోసానికి పాల్పడిన తీరు, ఇతర అంశాలపై విచారణ చేపట్టనుంది. డీఎస్పీ వెంకట్రావు నేతృత్వంలోని మరో కమిటీ... నిందితులను అదుపులోకి తీసుకుని.. విచారణ వేగవంతం చేయనుంది. రెండు కమిటీలు... టికెట్ల సొమ్ము పక్కదారి పట్టిన వ్యవహారంపై పూర్తి దర్యాప్తు చేయనున్నాయి.

శ్రీశైలం దేవస్థానం నిర్వహిస్తున్న పెట్రోల్ బంకులో.. 2016లో రూ.42 లక్షల కుంభకోణం జరిగింది. ఇందులో ఇద్దరు రెగ్యులర్, ఇద్దరు తాత్కాలిక ఉద్యోగుల ప్రమేయం ఉన్నట్లు తేల్చి వీరిపై కేసులు నమోదు చేశారు. ఆ తర్వాత మరో ఉద్యోగి... కైలాస కంకణాల విషయంలో రూ.3 లక్షలు అవినీతికి పాల్పడ్డాడు.

ఈ ఏడాది జనవరిలో విరాళాల కేంద్రంలో... ఒప్పంద ఉద్యోగి నాగేశ్వరరావు 14.70 లక్షల రూపాయల అవినీతి పాల్పడినట్లు విచారణలో తేలింది. ఈ విచారణలో మరో ఇద్దరు ఒప్పంద ఉద్యోగులు రూ.56 లక్షలు స్వాహా చేసినట్లు గుర్తించారు. ఈ వ్యవహారాలన్నింటిపై.. శ్రీశైలం దేవస్థానాన్ని పూర్తిస్థాయిలో ప్రక్షాళన చేపట్టాల్సిన ఆవశ్యకత ఉందని భక్తులు అంటున్నారు.

ఇదీ చదవండి :దేవాలయాల ఆస్తులపై శ్వేతపత్రం విడుదల చేయండి: పరిపూర్ణానంద