ప్రస్తుతం కృష్ణా జిల్లావ్యాప్తంగా ఉన్న ఓట్లలో 40శాతం ఓట్లు 18 నుంచి 39 ఏళ్లలోపువారివే ఉన్నాయి. అంటే వీరి ఓట్లు ఎన్నికల్లో కీలకం కానున్నాయి. సాధారణంగా గతంలో ఓటు నమోదు చేసుకోవాలంటే స్థానిక పాలకులు, నాయకులు వెళ్లి దరఖాస్తు పూర్తి చేయించేవారు. అది కాలక్రమేణా మారుతూ వచ్చింది. ప్రస్తుతం ఓటు నమోదుకు అంతర్జాలం ద్వారా అనేక అవకాశాలు కల్పించడంతో నమోదు చేసుకునే యువత పెరుగుతున్నారు. 21వేలకుపైగా 18 నుంచి 19 ఏళ్లలోపు వారు ఉంటే 20 నుంచి 29 ఏళ్లలోపు 7లక్షలకుపైగా ఉన్నారు. ఓటుహక్కు పొందడంలో చూపించిన ఉత్సాహం పోలింగ్‌బూత్‌ వరకు వెళ్లి ఓటు వేయడంలో కూడా చూపించాలి.
ఓట్లు దక్కించుకునేందుకు పాట్లు
యువత ఓట్లే ఆయా పార్టీల గెలుపును నిర్ధేశిస్తాయని పలువురు రాజకీయ నాయకులు భావిస్తున్నారు. ఈ క్రమంలోనే వారు బలపరిచిన అభ్యర్థులు విజయం సాధించేందుకు వారి ఓట్లు దక్కించుకునేందుకు వ్యూహరచన చేస్తున్నారు. బృందాలకు నాయకత్వం వహించేవారితో మాట్లాడి వారికి క్రీడా పరికరాలతోపాటు పలు తాయిలాలు ఇచ్చేందుకు సంప్రదింపులు చేస్తున్నారు. ఇలా యువత ఆకాంక్షను బట్టి వారి అవసరాలు తీర్చి ఓట్లు వేయించుకోవాలని ఎవరికి వారు తాపత్రయ పడుతున్నారు. కొన్ని చోట్ల యువత కూడా స్థానిక సంస్థల ఎన్నికల్లో తలపడేందుకు ఉత్సాహం చూపిస్తుండగా గ్రామాల్లో ప్రభావితం చేయగల యువకులను అభ్యర్థులుగా నిలబెట్టేందుకు ఆయా పార్టీలు ప్రయత్నిస్తున్నాయి.
నియోజకవర్గం వారీగా ఓటర్ల జాబితా ఇదీ చదవండి:గుడివాడ డివిజన్లో సర్పంచి పదవికి 214.. వార్డులకు 952 నామినేషన్లు
