నేరేడ్మెట్ డివిజన్లో తెరాస అభ్యర్థి విజయం
తెలంగాణ జీహెచ్‌ఎంసీ పరిధిలోని నేరేడ్మెట్ ఫలితం వెల్లడైంది. 668 ఓట్ల ఆధిక్యంతో తెరాస అభ్యర్థి మీనా ఉపేందర్‌ రెడ్డి గెలుపొందారు. జీహెచ్‌ఎంసీ ఫలితాలు వెలువడిన ఈ నెల 4వ తేదీనే నేరేడ్మెట్ డివిజన్ లెక్కింపు చేపట్టారు. తెరాస అభ్యర్థి 504 ఓట్ల మెజారిటీలో ఉన్నప్పటికీ... ఇతర ముద్రతో ఉన్న ఓట్లు 544 ఉన్నాయి. ఇతర ముద్రతో ఉన్న ఓట్లు మెజారిటీ కంటే ఎక్కువగా ఉండటం వల్ల హైకోర్టు ఆదేశాల నేపథ్యంలో ఆ డివిజన్ ఫలితాన్ని ప్రకటించలేదు.
ఇతర ముద్రలు ఉన్న ఓట్లు పరిగణనలోకి తీసుకునేందుకు హైకోర్టు అనుమతించడం వల్ల నేరేడ్మెట్ డివిజన్లో లెక్కింపును ఈ ఉదయం చేపట్టారు. సైనిక్‌పురిలోని భవన్స్‌ వివేకానంద కళాశాలలో లెక్కింపు కొనసాగింది. ఇతర గుర్తులున్న 544 ఓట్ల లెక్కింపు చేపట్టారు. ఇంతకుముందు ఆధిక్యంలో ఉన్న తెరాస అభ్యర్థే ఇక్కడ విజయం సాధించారు.