అదృశ్యమైన ముగ్గురు విద్యార్థినుల ఆచూకీ లభ్యం

పామర్రులోని ఓ కళాశాలలో ఇంటర్ చదువుతున్న ముగ్గురు విద్యార్థినులు ఇవాళ ఉదయం నుంచి అదృశ్యమయ్యారు. కళాశాల యాజమాన్యం ఫిర్యాదుతో పోలీసులు దర్యాప్తు చేపట్టగా విజయనగరం రైల్వేస్టేషన్​లో కనిపించారు.

కృష్ణా జిల్లా పామర్రు మండలం నాగాపట్నంలో ప్రగతి జూనియర్ కళాశాల హాస్టల్ నుంచి అదృశ్యమైన ముగ్గురు విద్యార్ధినుల ఆచూకీ లభ్యమైంది. విజయనగరం రైల్వే స్టేషన్​లో వారిని పోలీసులు గుర్తించారు. గుడ్లవల్లేరు మండలానికి చెందిన రష్మిత, అవనిగడ్డకు చెందిన శ్రీయ, గుంటూరు జిల్లా తెనాలికి చెందిన మరో విద్యార్థిని నికిత... నాగాపట్నంలోని ప్రగతి జూనియర్ కళాశాలలో మొదటి సంవత్సరం చదువుతున్నారు. కళాశాల హాస్టల్​లో ఉండి చదువుతున్న వారు ఇవాళ అదృశ్యమయ్యారు. కళాశాల యాజమాన్యం పామర్రు పోలీసు స్టేషన్​లో ఫిర్యాదు చేయగా.. పోలీసులు దర్యాప్తు చేపట్టారు. ఈ క్రమంలో విజయనగరం రైల్వే స్టేషన్​లో వారిని గుర్తించి... తమ సంరక్షణలోకి తీసుకున్నారు. విజయనగరం రైల్వే స్టేషన్​ వరకు ఎలా వచ్చారని పోలీసులు ప్రశ్నించగా... లారీ ఎక్కి వచ్చామని సమాధానమిచ్చారు విద్యార్థినులు.