Tdp leaders fire on government : గొడ్డలి పోటుని గుండెపోటుగా చిత్రీకరించిన సజ్జలా.. విలువల గురించి మాట్లాడేది అని టీడీపీ నేత, మాజీ మంత్రి దేవినేని ఉమామహేశ్వరరావు ధ్వజమెత్తారు. పింక్ డైమండ్ గురించి అసత్యాలు మాట్లాడింది ఎవరని నిలదీశారు. బూతుల్లో డిస్టింక్షన్ సాధించిన మంత్రుల్ని పక్కన పెట్టుకుని నీతి సూత్రాలు వెల్లడించడం సిగ్గుచేటని మండిపడ్డారు. జగన్మోహన్ రెడ్డి పైశాచకత్వం పరాకాష్టకు చేరిందని టీడీపీ పొలిట్ బ్యూరో సభ్యుడు కొల్లు రవీంద్ర ధ్వజమెత్తారు. ఒక బీసీ నాయకుడు ఏర్పాటు చేసిన పార్టీ కార్యాలయాన్ని ధ్వంసం చేయడమేనా బీసీల పట్ల చూపించే చిత్తశుద్ధి అని దుయ్యబట్టారు. బీసీ సబ్ ప్లాన్ నిధులు దుర్వినియోగం చేసి, 26మంది బీసీ నాయకుల్ని చంపించటం వాస్తవం కాదా..? అని నిలదీశారు. ధైర్యముంటే బీసీలకు ఎవరేం చేశారో బహిరంగ చర్చకు రావాలని సవాల్ విసిరారు.
రాష్ట్రంలో కొంతమంది కళంకిత పోలీస్ అధికారులు వైఎస్సార్సీపీ అనుచరులుగా దిగజారి పనిచేస్తున్నారు. పట్టాభి కిడ్నాప్ వ్యవహారం మొత్తం సీఎంఓ కార్యాలయం, సజ్జల రామకృష్ణారెడ్డి, రఘురామరెడ్డి డైరెక్షన్ లో జరిగింది. పట్టాభిని భయపెట్టాలనుకున్నారు.. ప్రభుత్వం అవినీతి, అరాచకత్వాన్ని ప్రశ్నిస్తున్నాడనే ఉద్దేశంతోనే టార్గెట్ చేశారు. కారుపై దాడి జరిగినా, ఇంటిపై దాడి జరిగినా ఇంతవరకు అరెస్టుల్లేవు. పార్టీ రాష్ట్ర కార్యాలయంపై దాడి జరిగినా అరెస్టుల్లేవు. చంద్రబాబు నాయుడు ఇంటిపైకి దాడికి వచ్చిన వారు.. క్యాబినెట్ మినిస్టర్లు అయ్యారు.. మాచర్లలో పార్టీ ఆఫీస్ పై దాడి చేశారు. మళ్లీ గన్నవరంలో హింసాకాండకు పాల్పడ్డారు. బచ్చుల అర్జునుడు ఆస్పత్రిలో చావుబతుకుల్లో కొట్టుమిట్టాడుతుంటే.. రెండు సార్లు బీ ఫాం ఇచ్చిన కన్నతల్లి లాంటి పార్టీ ఆఫీస్ పై వంశీ దాడులకు పాల్పడి, స్వైర విహారానికి పాల్పడడం అమానుషం. - దేవినేని ఉమామహేశ్వరరావు, మాజీ మంత్రి