వేసవిలో తాగు, సాగునీటి లభ్యతపై సందేహాలు

వేసవి వచ్చేసింది. ఎండలు మండిపోతాయని వాతవారణ శాఖ అంచనా వేస్తోంది. ప్రభుత్వం తాగు, సాగునీటి అవసరాలు అత్యంత కీలకం కానున్నాయి. ప్రస్తుతం రాష్ట్రంలోని ఉమ్మడి జలశయాలు 13 జిల్లాలోని మధ్య, భారీ జలశయాల్లో సగం వరకు నీళ్లున్నాయి. రానున్న నాలుగు నెలల పాటు తాగునీటి అవసరాలు తీర్చుకోవల్సి ఉంది. కొన్ని చోట్ల ఇంకా రబీకి నీటిని అందించాలి. ప్రస్తుతం అందుబాటులో ఉన్న నీళ్ల సరిపోతాయా? అధికారులు ఏం చేయబోతున్నారనే కోణంలో ప్రత్యేక కథనం.

రాష్ట్రంలో ఈ ఏడాది మెరుగైన వర్షపాతం నమోదైంది. జూన్‌ తర్వాత ఇప్పటివరకు సాధారణం కన్నా 25% అధిక వర్షం కురిసింది. రాష్ట్రంలో సగటున ఇప్పటివరకు 873.6 మిల్లీమీటర్ల వర్షం కురవాలి. ఈ ఏడాది 1,095.7 మిల్లీమీటర్లు కురిసింది. ఎప్పుడూ కరవుతో ఉండే రాయలసీమ జిల్లాల్లోనూ అత్యధిక వర్షపాతం నమోదైంది. కడప జిల్లాలో సాధారణ కన్నా 75% అధికంగా కురవడం విశేషం. దాంతో జలాశయాలన్నీ మొదట్లో కళకళలాడాయి. ప్రస్తుతం సగం వరకు అంటే 265 టీఎంసీల నీళ్లున్నాయి. ఇంత నీరున్నా ధవళేశ్వరం బ్యారేజి కావడం, గోదావరికి ఎగువ నుంచి ప్రవాహాలు ఆగిపోవడంతో ఉభయగోదావరి జిల్లాల్లో 8 లక్షల ఎకరాల సాగు ఇబ్బందులు ఎదుర్కొంటోంది. శ్రీశైలం జలాశయంలోనూ నీళ్లున్నా కేసీ కెనాల్‌ కింద కూడా కొంతమేర ఆయకట్టుకు నీటి సమస్యలు ఎదురవుతున్నాయి. తుంగభద్ర నుంచి ఇంకా రెండు టీఎంసీల వరకు కేసీ కెనాల్‌ కోటా కింద తీసుకునే వెసులుబాటు ఉన్నందున ఇబ్బందులు ఉండబోవని అధికారులు చెబుతున్నారు.

కొన్నిచోట్ల తాగునీటికి ఏర్పాట్లు చేసుకోవాల్సిందే

రాష్ట్రంలోని 13 జిల్లాల్లో 265 టీఎంసీలకు పైగా నీటి నిల్వలు ఉన్నా.. వేసవిలో సులభంగా గట్టెక్కవచ్చనే పరిస్థితులు లేవు. జలాశయాల్లోని నీటిని అన్ని ప్రాంతాలకు తరలించే అవకాశం లేకపోవడమే ఇందుకు కారణం. మరోవైపు వేసవిలో భూగర్భజలాలు తగ్గుతాయి. అలాంటిచోట్ల నీటి సవాళ్లు ఎదుర్కోవాల్సి ఉంటుంది. ఇప్పటికే ప్రభుత్వ రక్షిత నీటి సరఫరా విభాగం ప్రత్యామ్నాయ ఏర్పాట్లు చేస్తోంది.
ఆశాజనకంగా దక్షిణాది ప్రాజెక్టులు

కేంద్ర జలసంఘం తాజా నివేదిక ప్రకారం దక్షిణాదిన 37 జలాశయాల్లో సగం నీటి నిల్వలు ఉన్నాయి. వీటి మొత్తం సామర్థ్యం 54.60 బిలియన్‌ క్యూబిక్‌ మీటర్లు కాగా ప్రస్తుతం 27.04 బిలియన్‌ క్యూబిక్‌ మీటర్ల నీళ్లున్నాయి. కిందటి ఏడాది ఇదే సమయానికి 45 శాతమే నిల్వలున్నాయి.

ఇవీ చదవండి