'రైతులవి గొంతెమ్మ కోర్కెలు కాదు... న్యాయపరమైన డిమాండ్లు'

ప్రధాన మంత్రి, హోంమంత్రి ఓ మెట్టు దిగి.. రైతుల న్యాయపరమైన డిమాండ్లు నెరవేర్చాలని, తెదేపా పొలిట్ బ్యూరో సభ్యులు సోమిరెడ్డి చంద్రమోహన్ రెడ్డి అన్నారు. అన్నదాతలు గొంతెమ్మ కోర్కెలు కోరటం లేదని అన్నారు.

మార్కెటింగ్ వ్యవస్థను కొనసాగిస్తూ... మరింత పటిష్టం చేయాలని తెదేపా పొలిట్ బ్యూరో సభ్యులు సోమిరెడ్డి చంద్రమోహన్ రెడ్డి అన్నారు. కేంద్ర ప్రభుత్వం తీసుకువచ్చిన నూతన వ్యవసాయ బిల్లులకు వ్యతిరేకంగా రైతులు చేపట్టిన ఉద్యమం 39 రోజులు దాటిందన్నారు. 8 డిగ్రీల ఉష్ణోగ్రత ఒకవైపు.. జోరున వర్షం మరోవైపు నిరసనలకు ఆటంకం కలిగిస్తున్నా... ప్రాణాలకు తెగించి రైతులు పోరాడుతున్నారన్నారు. రైతులు గొంతెమ్మ కోర్కెలు కోరటం లేదనీ... న్యాయపరమైన డిమాండ్లు తీర్చేందుకు ప్రధాని మోదీ, కేంద్ర హోం మంత్రి అమిత్​షా ఓ మెట్టు దిగాలని కోరారు.

తెలుగు రాష్ట్రాల్లో 60 శాతం రైతులు మార్కెట్ యార్డుల ద్వారానే పంటను అమ్ముకుంటున్నారని గుర్తు చేశారు. పట్టింపులతో, మెుండితనంతో రైతులకు అన్యాయం చేస్తే... పరిస్థితులు దారుణంగా ఉంటాయని సోమిరెడ్డి హెచ్చరించారు.

ఇదీ చదవండి:శాస్త్రవేత్తలను చూసి దేశం గర్విస్తోంది: మోదీ