చైనాతో సరిహద్దు వివాదం రాజుకున్నాక... ఆ దేశానికి చెందిన యాప్‌లను మన దేశం నిషేదించింది. స్వదేశంలో... నెక్ట్స్‌జెన్‌ ఇంక్యుబేషన్‌ స్టార్టప్స్‌ అభివృద్ధికి ఊతమివ్వాలని సంకల్పించింది. తద్వారా ఆత్మనిర్భర్ భారత్ లక్ష్యం వైపు ముందడుగు పడుతుందని భావిస్తోంది. దేశీయంగా ఐటీ రంగంలో సరికొత్త ఆవిష్కరణలకు శ్రీకారం చుట్టేందుకు... కేంద్ర ఐటీ మంత్రిత్వశాఖ అనేక విధానాలు తీసుకొచ్చింది. ఇందులో భాగమే.. సాఫ్ట్వేర్ టెక్నాలజీ పార్కు ఆఫ్‌ ఇండియా.
యువ ఆవిష్కరణలను ఒడిసిపట్టే దిశగా
ఎస్టీపీఐ.. యువ నవ ఆవిష్కరణలను ఒడిసిపట్టే ప్రయత్నం చేస్తోంది. విజయవాడ పాలిటెక్నిక్‌ కళాశాల ఆవరణలో ఎస్టీపీఐ యూనిట్‌ ఉంది. ఇటీవల తమ క్యాంపస్‌ను విన్‌సిటీ టవర్‌తో అప్‌గ్రేడ్‌ చేసింది. ఔత్సాహిక ఐటీ రంగ పరిశ్రమలు స్థాపించే వారికి.... సకల సదుపాయాలతో ఇంక్యుబేషన్‌ సేవలతో కూడిన పని ప్రదేశాన్ని ఈ సంస్థ కల్పిస్తోంది. విజయవాడలోనూ, ఇతర ప్రాంతాల్లో ఐటీ రంగానికి సంబంధించి వినూత్న ఆలోచనలు ఉంటే వాటిని అభివృద్ధి చేసేందుకు ఎస్టీపీఐ కృషి చేస్తోంది. ఆసక్తి కలిగిన యువతతో మాట్లాడి వారికి కేంద్ర ఐటీ మంత్రిత్వశాఖ ప్రవేశపెట్టిన చునావత్‌ పథకం గురించి వివరించి సందేహాలు నివృత్తి చేస్తోంది. మార్గదర్శనం చేయడానికి మెంటార్స్‌ను నియమించింది.
నిధులు సమకూరుస్తుంది
ఐటీ ఆధారిత ఆవిష్కరణలకు ప్రోత్సాహం అందించడానికి యువత ఆసక్తిని ఎస్టీపీఐ కోరుతోంది. వాట్సప్‌, యూట్యూబ్‌, ఫేస్‌బుక్‌, ట్విట్టర్‌, ఫ్లిప్‌కార్ట్‌ ఇలాంటి వాటికి సంబంధించి వినూత్న ఆలోచనలు ఉండి... ప్రతిభ ఉన్నా వెలుగులోకి రాని పరిస్థితిలో ఉండిపోయిన వారికి అవసరమైన చేయూత ఇవ్వాలని నిర్ణయించింది. 6 నెలల స్టైఫండ్‌తోపాటు సీడ్‌ ఫండింగ్‌ పేరిట రూ. 10 లక్షల నుంచి రూ. 25 లక్షల రూపాయల వరకు అందజేస్తుంది. కేవలం సబ్సిడీగా నిధులు విడుదల చేసి వదిలేయకుండా.. ఆలోచన నుంచి ఆవిష్కరణ వరకు నిపుణుల పర్యవేక్షణలో ఎప్పటికప్పుడు పరిస్థితులను సమీక్షించడం... ఔత్సాహికుల్లో విశ్వాసాన్ని పెంచేందుకు కొత్త ఆవిష్కరణలో కేంద్ర ప్రభుత్వం సైతం వాటాదారుగా నిలిచి వెన్నుతట్టి ముందుకు నడిపిస్తుంది. దీనివల్ల ఏ దశలోనూ నిధుల సమస్య ఉత్పన్నం కాకుండా ఉండేందుకు ఈ పద్ధతి ఉపయోగపడుతుందని ఎస్టీపీఐ చెప్తోంది.