పిల్లలను వదల్లేక... స్వామిని దర్శించుకోలేక!

కొవిడ్ 19 చిన్నారులకు, తల్లి తండ్రులకు కష్టాలు తెచ్చిపెట్టింది. అల్లారుముద్దుగా పెంచుకుంటున్న చిన్నారిని వదిలి వెళ్లి ఒంటరిగా స్వామి దర్శనం చేసుకోలేక... ఆ తల్లిదండ్రులు సతమతమవుతున్నారు. చిన్నారులతో కలిసి ఆలయం లోపలికి ప్రవేశించిడానికి అధికారులు అనుమతించకపోవటంతో... స్వామీ క్షమించు అంటూ వెనుదిరుగుతున్నారు. మోపిదేవిలోని సుబ్రహ్మణ్యేశ్వరస్వామి ఆలయానికి వచ్చి వెళ్తున్న ఇలాంటి భక్తులపై ప్రత్యేక కథనం.

కృష్ణా జిల్లా మోపిదేవి మండలం మోపిదేవి గ్రామంలో స్వయంభూ శ్రీ వల్లీ దేవసేనా సమేత శ్రీ సుబ్రహ్మణ్యేశ్వర స్వామి ఆలయానికి అది, మంగళ, గురువారాల్లో వేల సంఖ్యలో భక్తులు స్వామి వారిని దర్శించుకుని, మొక్కుబడులు తీర్చుకుంటారు. రాష్ట్రం నుంచే కాకుండా భక్తులు ఇతర దేశాలు, రాష్ట్రాల నుంచి వచ్చి స్వామిని దర్శించుకుంటారు.

ప్రధానంగా మోపిదేవి ఆలయంలో... స్వామి దర్శనంతో సంతానం లేని వారికి సంతానం కలగడం, నేత్ర దోషాలు, శత్రు భయాలు తొలగుతాయని భక్తుల ప్రగాఢ విశ్వాసం. చిన్నారులకు అక్షరాభ్యాసం, అన్నప్రాసన, కుట్టుపోగులు, తలనీలాలు, ఉయ్యాల సేవలు ఆలయంలో ఎక్కువగా జరుగుతాయి.

పిల్లలను గుడి బయట వదిలి వెళ్లలేకపోతున్నాం

ఆలయానికి కుటుంబ సమేతంగా వచ్చి స్వామి దర్శనం చేసుకుంటారు. కొవిడ్ 19 కారణంగా... కొన్ని నెలల పాటు ఆలయాన్ని మూసివేశారు. ప్రభుత్వ ఉత్తర్వుల మేరకు దేవాదాయశాఖ అధికారులు 10 సంవత్సరాల లోపు పిల్లలు, 65 సంవత్సరాల పైబడిన వృద్ధులను ఆలయంలోకి అనుమతించకూడదని షరతులు విధించారు.

చిన్నారులను గుడి బయట వదిలి... తల్లిదండ్రులు స్వామి దర్శనం చేసుకోలేక ఇబ్బందులు పడుతున్నారు. కొందరు భక్తులు దర్శనం చేసుకోకుండానే వెనుదిరుగుతున్నారు. మరికొందరు భక్తులు దగ్గరలోని నాగేంద్రస్వామి పుట్టల వద్ద మొక్కుబడులు తీర్చుకుంటున్నారు. మొక్కుబడులు చెల్లించుకోకపోతే ఏమి జరుగుతుందోనని భక్తులు ఆందోళనకు గురవుతున్నారు.

అధికారులు తగు చర్యలు తీసుకోవాలి

ఆన్ లాక్ 5.0 నిబంధనల ప్రకారం దేవాదాయ శాఖ అధికారులు తగునిర్ణయం తీసుకోవాలని భక్తులు కోరుతున్నారు. భౌతిక దూరం పాటిస్తూ, మాస్కులు ధరించిన చిన్నారులను వృద్ధులను మోపిదేవి ఆలయంలోకి అనుమతించాలని దేవాదాయశాఖ అధికారులను వేడుకుంటున్నారు.

ఇదీ చదవండి: