రహదారి నిర్మాణంలో గుత్తేదారు నిర్లక్ష్యం.. రైతుల పాలిట శాపం..
Neglect Of NHAI-216 Construction Of ByPass Road: ఇది కృష్ణా జిల్లా మోపిదేవి మండలం మీదుగా వెళ్తున్న 216వ జాతీయ రహదారి. రెండేళ్ల నుంచి పంట పొలాల మధ్యగా బైపాస్ రోడ్డు నిర్మాణం చేస్తున్నారు. ఈ పనులు రైతులకు శాపంగా మారాయి. పెదప్రోలు, కొక్కిలిగడ్డ, కాసానగర్, కప్తానుపాలెం, చల్లపల్లి, మాజేరు పరిసర గ్రామాల్లో గతంలో మురుగునీరు పోవడానికి డ్రైనేజీ వ్యవస్థ ఉండేది. జాతీయ రహదారి నిర్మాణంతో అది పూడిపోయింది. దీని వల్ల నీరు పోయే మార్గం లేక పంట పొలాలు తరచూ నీటమునుగుతున్నాయి. మాండౌస్ తుపానుతో ఇటీవల కురిసిన వర్షాలకు దాదాపు 3 వేల ఎకరాల్లోని వరి పొలాల్లో మోకాళ్ల లోతు వరకు నీరు నిలిచింది. ఫలితంగా అన్నదాతలు పూర్తిగా నష్టపోయారు.