రాజకీయ దళారీగా మారిన ఇంటెలిజెన్స్ చీఫ్.. : ఎమ్మెల్యే కోటంరెడ్డి

MLA Kotam reddy : మార్గదర్శి మీద ఏ ఒక్కరైనా ఫిర్యాదు చేశారా..? మార్గదర్శి వల్ల ఏ ఒక్కరికైనా నష్టం జరిగిందా..? 50 ఏళ్లుగా ఎన్నో సంస్థలు, బ్యాంకులు దివాలా తీసినా.. ప్రజల్లో నమ్మకంతో మార్గదర్శి విజయవంతంగా కొనసాగుతోంది అని నెల్లూరు ఎమ్మెల్యే కోటంరెడ్డి పేర్కొన్నారు. ఇంటెలిజెన్స్ చీఫ్ సీతారామాంజనేయులు రాజకీయ దళారీగా మారి రామోజీరావుపై ఢిల్లీలో అసత్యాలు మాట్లాడించేందుకు ఉండవల్లిని ఉసిగొల్పుతున్నారని తెలిపారు. రామోజీరావుని వేధింపులతో, బెదిరింపులతో వెంటాడితే దారిలోకి వస్తాడనుకోవడం అమాయకత్వం అని కోటంరెడ్డి స్పష్టం చేశారు.

MLA Kotam reddy : ఇంటెలిజెన్స్ చీఫ్ సీతారామాంజనేయులు అధికార దుర్వినియోగానికి పాల్పడుతున్నారని నెల్లూరు రూరల్ ఎమ్మెల్యే కోటంరెడ్డి శ్రీధర్​రెడ్డి ఆగ్రహం వ్యక్తం చేశారు. రాజకీయ దళారీగా వ్యవహరిస్తున్న సీతారామాంజనేయులుకు ఉద్యోగులను, ఎమ్మెల్యేలను వేధించడం తప్ప ఇంకేం పని లేదు అని కోటంరెడ్డి మండిపడ్డారు. ఉండవల్లి అరుణ్ చేత ఢిల్లీలో మాట్లాడించేందుకు ప్రయత్నాలు జరుగుతున్నాయని... ఈనాడు, మార్గదర్శి, రామోజీరావుపై ఉండవల్లి చేత ఇవాళ గానీ, రేపు గానీ మాట్లాడించబోతున్నాడని తెలిపారు. వైఎస్సార్సీపీ నేతల మాటలు ఢిల్లీ నాయకత్వం వినడం లేదని.. ఉండవల్లిని ట్రాప్ చేసి ఢిల్లీకి పంపిస్తున్నారని ఎమ్మెల్యే కోటంరెడ్డి పేర్కొన్నారు.

ఉండవల్లి గారూ.. ట్రాప్​లో పడొద్దు.. 20 ఏళ్లుగా ఉండవల్లికి నేను ఏకలవ్య శిష్యుడిని అని చెప్పుకొన్న కోటంరెడ్డి.. "ఉండవల్లి గారూ మీకు మంచి గౌరవం ఉంది.. మీరు వైఎస్సార్సీపీ ట్రాప్​లో పడొద్దు.. సీతారామాంజనేయులు మిమ్మల్ని ట్రాప్ చేస్తున్నారు.. రామోజీరావుని వేధిస్తే ఆయన మీకు లొంగుతాడని అనుకోవడం అవివేకం" అని తెలిపారు. సాక్షి ఛానెల్​కి నన్ను పిలవండి.. చర్చ పెట్టండి... ఈనాడు గురించి, రామోజీరావు గురించి మాట్లాడుతా అని అన్నారు. మార్గదర్శిపై మీరు ఇంతలా వేధింపులకు గురి చేస్తున్నారు.. ఒక్కరన్నా బాధితులు మీకు ఫిర్యాదు చేశారా..? అని కోటంరెడ్డి ప్రశ్నించారు. ఒక్కరన్నా మార్గదర్శి కార్యాలయం వద్దకి వెళ్లి తమ డబ్బులు ఇవ్వాలని డిమాండ్ చేశారా..? సీతారామాంజనేయులు ఉలిక్కిపడకండి...? మీ రహస్య ప్రణాళిక నాకు ఎలా తెలిసిందో అని భయపడొద్దు అని కోటంరెడ్డి అన్నారు. మీకు రాష్ట్ర వ్యాప్తంగా నెట్ వర్క్ ఉంటే... నాకు మీ దగ్గరే నెట్ వర్క్ ఉంది.. నాకు సెక్యూరిటీ తగ్గించావ్, అనేకమందిని వేధింపులకు గురిచేశావ్.. మీ బాగోతం మరో ఆరు నెలల్లో ముగుస్తుంది... మీ ఆటలు ఇక సాగవు అని ఎమ్మెల్యే కోటం రెడ్డి పేర్కొన్నారు.

సీనియర్ ఐపీఎస్ అధికారి సీతారామాంజనేయులు రాజకీయ దళారీగా మారారు. ఆయన వ్యవహార శైలి చాలా బాధాకరంగా ఉంది. రాష్ట్రంలో శాంతి భద్రతలు అదుపులో ఉంచాల్సిన పనులు వదిలేసి ప్రతిపక్ష నేత పర్యటనలు ఎలా అడ్డుకోవాలి..? జనసేన అధినేత పర్యటనలు అడ్డుకోవడం, బీజేపీ నేతలపై దాడులు, కాంగ్రెస్, సీపీఎం, సీపీఐ రాజకీయ కార్యక్రమాలను అడ్డుకోవడంపై దృష్టి పెడుతున్నారు. పోలీసు బలగాలను ఉపయోగించుకుని వేధింపులు, అణచివేత ధోరణికి పాల్పడుతున్నారు. ముఖ్యమంత్రి కనుసన్నల్లో పనిచేస్తూ ప్రతి ఒక్కరూ ఇబ్బందులకు గురవుతున్నారు. అధికార పార్టీకి చెక్కభజన చేస్తూ పబ్బం గడుపుతున్నారు. ఉండవల్లి అరుణ్ కుమార్ ను ఇవాళో రేపో ఢిల్లీకి పంపి ఈనాడు, మార్గదర్శి విషయాల గురించి రామోజీరావుపై మాట్లాడించే ప్రయత్నం చేస్తున్నారు. నేను ఉండవల్లిని ఆదర్శంగా తీసుకుంటా.. ఆయనకు నేను ఏకలవ్య శిష్యుడిని.. దయచేసి సీతారామాంజనేయులు ట్రాప్​లో పడొద్దు.. అని అరుణ్​ కుమార్​ని అభ్యర్థిస్తున్నా. బెదిరింపులతో రామోజీరావు గారు దారిలోకి వస్తారనుకుంటే అది అమాయకత్వం. - కోటంరెడ్డి శ్రీధర్ రెడ్డి, నెల్లూరు రూరల్​ ఎమ్మెల్యే

ఇవీ చదవండి