'కాల్‌ డేటాను పరిశీలించే కొల్లు రవీంద్రను అరెస్టు చేశాం'

మచిలీపట్నంలో వైకాపా నాయకుడు భాస్కర్‌రావు హత్య కేసులో ​ప్రధాన నిందితుడిగా నాంచారయ్య అలియాస్ చిన్న అనే వ్యక్తి ఉన్నట్టు ఎస్పీ రవీంద్రబాబు వెల్లడించారు. కొల్లు రవీంద్రకు హత్యతో సంబంధం ఉందన్న ఆయన... కాల్​డేటాని పరిశీలించిన అనంతరమే అరెస్టు చేశామని తెలిపారు.

మచిలీపట్నంలో వైకాపా నాయకుడు భాస్కర్‌రావు హత్య కేసులో మరో ముగ్గుర్ని అరెస్ట్​ చేసినట్లు ఎస్పీ రవీంద్రబాబు తెలిపారు. నిందితుల్లో నాంచారయ్య అలియాస్ చిన్న అనే వ్యక్తి ప్రధాన నిందితుడిగా ఉన్నాడని తెలిపారు.

అసలు విభేదం ఇలా...
ప్రధాన నిందితుడు నాంచారయ్య, భాస్కర్‌రావు మధ్య కొన్ని సంవత్సరాల నుంచి విభేదాలు ఉన్నాయి. దానికితోడు.. 6 నెలల్లో వారిద్దరి మధ్య రాజకీయ ఆధిపత్య పోరు బాగా పెరిగిందని ఎస్పీ తెలిపారు. దీంతో భాస్కర్‌రావును అడ్డు తొలగించుకోవాలనే ఉద్ధేశంతో మాజీ మంత్రి కొల్లు రవీంద్రను కలిశారు. భాస్కర్‌రావు హత్యకు 4 రోజుల ముందు రవీంద్రతో మాట్లాడారు. తనపేరు బయటకు రాకుండా చూడాలని మాజీ మంత్రి చెప్పారని... అనంతరం హత్య చేసేందుకు ముందుగా రెక్కీ నిర్వహించారని ఎస్పీ చెప్పారు.

రవీంద్ర అరెస్టుకు కారణం...
హత్య జరిగిన అనంతరం నిందితులు రవీంద్రతో మాట్లాడారని...కాల్ డేటాను పరిశీలించిన అనంతరమే కొల్లు రవీంద్రను అరెస్టు చేశామని ఎస్పీ చెప్పారు. నిందితుల నుంచి వాంగ్మూలం తీసుకున్నామని అన్నారు.

కొల్లు రవీంద్ర అరెస్టు ఇలా..

మృతుని బంధువులు ఇచ్చిన ఫిర్యాదులో ఏ4 నిందితుడిగా ఉన్న కొల్లు రవీంద్రను విచారించేందుకు పోలీసులు ఇంటికి వెళ్లగా... ఆయన గోడ దూకి పారిపోయారని ఎస్పీ తెలిపారు. ఈ మేరకు ప్రత్యేక బృందాలను ఏర్పాటు చేసి తుని సమీపంలోని సీతారామపురం వద్ద అదుపులోకి తీసుకున్నామని ఆయన అన్నారు.

ఈ కేసు విషయంలో ఎటువంటి రాజకీయ ఒత్తిడి లేదని... నిష్పక్షపాతంగా జరిగిన దర్యాప్తు ఆధారంగానే మాజీ మంత్రిని అదుపులోకి తీసుకున్నామని ఎస్పీ రవీంద్రబాబు తెలిపారు.

ఇదీ చదవండి:మచిలీపట్నం కోర్టుకు మాజీ మంత్రి కొల్లు రవీంద్ర