సెక్యూరిటికీ తూట్లు పొడుస్తున్న నెంబర్ ప్లేట్లు..!

హై సెక్యూరిటీ నెంబర్ ప్లేట్లు ఏర్పాటు వ్యవహారం ప్రహాసనంలా మారింది. ప్రతి వాహనానికి తప్పనిసరిగా హై సెక్యూరిటీ నెంబర్ ప్లేట్లు ఏర్పాటు చేయాల్సి ఉండగా.. చాలా మంది వాహన దారులు విస్మరిస్తున్నారు. యథేచ్చగా నిబంధనలు ఉల్లంఘిస్తున్నారు. అధికారుల పర్యవేక్షణ ఉదాసీనంగా ఉండటంతో..ఆశించిన ప్రయోజనం నెరవేరడం లేదు.

కొత్త వాహనానికి హై సెక్యూరిటీ నెంబర్ ప్లేట్ తప్పనిసరిగా ఏర్పాటు చేయాలన్నది నిబంధన. సుప్రీంకోర్టు ఆదేశాల మేరకు 2014 నుంచి దీన్ని దేశవ్యాప్తంగా అమలు చేస్తున్నారు. నకిలీ నెంబర్ ప్లెట్ల ఏర్పాటు చేసి నేరాలకు పాల్పడటానికి అవకాశంలేకుండా దీని ఏర్పాటును తప్పని సరిచేశారు. అన్ని రాష్ట్రాల్లోనూ హైసెక్యూరిటీ నెంబర్‌ ప్లేట్లు ఏర్పాటు చేస్తున్నారు. రాష్ట్రంలో హైసెక్యూరిటీ నెంబర్ ప్లేట్ల బిగింపు వ్యవహారం.... సక్రమంగా జరగడం లేదు. వాహనదారులు ఎవరికి నచ్చిన నెంబర్ ప్లేట్ల వారు బయట తయారు చేయించుకుని వాహనాలకు ఏర్పాటు చేసుకుంటున్నారు.

రాష్ట్రంలో హైసెక్యూరిటీ నెంబర్‌ ప్లేట్ల ఏర్పాటు బాధ్యతను వాహనాల డీలర్లకే కట్టబెట్టారు. తొలుత అందరూ సక్రమంగానే వీటిని ఏర్పాటు చేశారు. క్రమంగా చాలా చోట్ల పలువురు డీలర్ల నిర్లిప్తత ప్రదర్శిస్తున్నారు. ఈ కారణంగా హైసెక్యూరిటీ ప్లేట్లు ఏర్పాటు సక్రమంగా జరగడం లేదు. వాహనదారులు వారికి నచ్చినట్లు నెంబర్ ప్లేట్లు తయారు చేయించుకుంటున్నారు.

సెక్యూరిటీ నెంబర్ ప్లేటు అనేది ఒక సెక్యూరిటీ ఫీచర్ అండి. ఎందుకంటే... ఫేక్ వెహికిల్స్ బయటతిరగకుండా ఏదన్నా క్రైమ్​లో ఇన్వాల్స్ అయి నెంబర్ ప్లేట్లు మార్చుకొని లేదా పోలీస్ ఛలాన్లు.. ట్రాన్స్​పోర్టు డిపార్ట్​మెంట్ ఛలాన్స్ తప్పించుకునేందుకు వేరే నెంబర్ ప్లేట్స్ వేసుకోవడం... కొంతమంది ఏంటంటే.. ఆ స్టైలిష్ నేమ్​కు అలవాటుపడి ఆ లెటర్లలో ఒక రకమైన దీని కోసం మార్చేస్తుంటారు. స్టైలిష్ లెటరింగ్ కోసం ఈ హైసెక్యూరిటీ ప్లేట్లను పక్కన పెట్టి వారికి నచ్చిన విధంగా చేయించుకుంటున్నారు. దీనిపైన మేం డ్రైవ్ కూడా చేపట్టడం జరగింది అక్టోబర్ ఒకటి నుంచి. ఇందులో భాగంగానే దాదాపు 2500 కేసులు కూడా నమోదు చేశాం.

- పురేంద్ర, రవాణాశాఖ డీటీసీ

కొందరు వాహనదారులు ఉద్దేశపూర్వకంగా హై సెక్యూరిటీ నెంబర్ ప్లేట్లు ఏర్పాటు చేసుకోవడం లేదు. ఫ్యాన్సీనెంబర్లు కొనుగోలు చేసిన వారు తమకు నచ్చిన రీతిలో నెంబర్ ప్లేట్లు ఏర్పాటు చేసుకుంటున్నారు. ఇటీవల పలు ఫిర్యాదులు రావడంతో... తనిఖీలు చేపట్టిన రవాణాశాఖ అధికారులు నిర్లిప్తంగా వ్యవహరిస్తోన్న డీలర్లను గుర్తించి జరిమానా విధించారు. నిబంధనలు ఉల్లంఘించి తిరగుతుండగా భారీగా వాహనాలను పట్టుకున్నారు. హై సెక్యూరిటీ నెంబర్ ప్లేట్ల ఏర్పాటు చేయని పక్షంలో చర్యలు తీసుకుంటామని అధికారులు హెచ్చరిస్తున్నారు. హై సెక్యూరిటీ నెంబర్ ప్లేట్లు ఏర్పాటు చేయని కారణంగా పలుచోట్ల.. నేరగాళ్లు నేరాలకు పాల్పడుతున్నట్లు అధికారులు గుర్తించారు.

ఇదీ చూడండి: