సామాజిక మాధ్యమాల్లో మగువలపై పెరుగుతున్న వేధింపులు

ఫేస్ బుక్ ,ఇన్​స్టాగ్రామ్​ల్లో మహిళలపై వేధింపులు పెరుగుతున్నాయి. పరిచయం ఉన్నవారే శత్రువులుగా మారుతున్నారు. వ్యక్తి గత వివరాలు తెలుసుకుని మహిళల పేరుతో నకిలీ ఫేస్ బుక్ ఖాతాలు తెరచి అశ్లీల పదజాలంతో స్నేహితులకు మెస్సేజ్​లు పంపుతున్నారు. ఇలాంటి ఘటనలు కృష్ణా జిల్లా విజయవాడలో ఎక్కువగా జరుగుతున్నాయి.

పెరుగుతున్న సాంకేతిక పరిజ్ఞానమే ఒక్కోసారి ప్రమాదాలకు దారితీస్తుంది. ఫేస్ బుక్, ఇన్​గ్రామ్​ల్లో చాటింగ్, మనకు నచ్చిన పోస్టింగ్​లు పెట్టుకోవచ్చు. ఇదే అదనుగా చూసుకుని విజయవాడలో కొంతమంది మహిళలను వేధిస్తున్నారు. మొదట పరిచయం పెంచుకొని తర్వాత వ్యక్తిగత వివరాలు తెలుసుకుంటారు.

ఫేస్ బుక్​లో అప్ లోడ్ చేసిన ఫొటోలతో నకిలీ ఖాతాలను తెరచి మహిళలను వేధిస్తున్న ఘటనలు పెరుగుతున్నాయని సైబర్ క్రైమ్ పోలీసులు చెబుతున్నారు. విజయవాడ పెనమలూరుకు చెందిన మహిళకు ఓ అగంతుకుడు ఫోన్ చేసి తనకు డబ్బులు కావాలని డిమాండ్ చేశాడు. అడిగిన డబ్బు ఇవ్వకపోతే అశ్లీల ఫొటోలు సామాజిక మాధ్యమాల్లో అప్ లోడ్ చేస్తానంటూ బెదిరించాడు.

దీంతో షాక్​తిన్న బాధితురాలు సైబర్ క్రైమ్ పోలీసులకు ఫిర్యాదు చేసింది. రంగంలోకి దిగిన పోలీసులు నకిలీ ఖాతాగా గుర్తించారు. నిందితుడు బాధితురాలి పేరుతో నకిలీ ఖాతాలు తెరుస్తున్నట్లు గుర్తించారు. పోలీసులకు పట్టుబడకుండా ఉండేందుకు నిందితుడు రెండు రోజులకు ఒక కొత్త ఇన్​స్టాగ్రామ్ ఖాతాను తెరుస్తున్నట్లు పోలీసులు తెలిపారు.

ఐపీ అడ్రస్ ఆధారంగా నిందితుడు విశాఖలో ఉన్నట్లు గుర్తించి పోలీసులు అరెస్ట్ చేశారు. బాధితురాలికి పరిచయమున్న వ్యక్తే వేధించాడని విచారణలో తేలింది.

సామాజిక మాధ్యమాల్లో వ్యక్తిగత వివరాలు పొందుపరచవద్దని పోలీసులు సూచించారు. లైక్​ల కోసం, ఫాలోవర్స్​ను పెంచుకునేందుకు జీవితాన్నినాశనం చేసుకోవద్దని విజ్ఞప్తి చేశారు.

ఇదీ చూడండి