విజయవాడ గుణదల ప్రాంతానికి చెందిన ఓ మహిళ అకస్మాత్తుగా అస్వస్థతకు గురైంది. దగ్గరలో ఉన్న జీజీహెచ్‌కు తీసుకెళ్లారు. అక్కడ చేర్చుకోమని చెప్పారు. ఈఎస్‌ఐ ఆస్పత్రికి వెళ్లినా ప్రవేశం లేదు. ప్రైవేటు ఆస్పత్రికి వెళ్లే స్థోమత లేదు. అప్పటికప్పుడు ఆటోలో విజయవాడ నుంచి గుంటూరు జీజీహెచ్‌కు తరలించారు. ఈలోగా మహిళ మృతి చెందింది. గుండెపోటు రావడంతో మరణించినట్లు వైద్యులు ధ్రువీకరించారు. విజయవాడ జీజీహెచ్‌లో వైద్యం అందితే తమ అమ్మ బతికేదని కుమారుడు ఆవేదన వ్యక్తం చేశారు.
నిరుపేదల వైద్యశాల అయిన ప్రభుత్వ సార్వజన ఆస్పత్రిలో ఇప్పుడు సాధారణ వైద్య సేవలు అందడం లేదు. విజయవాడ జీజీహెచ్‌ను కొవిడ్‌ ఆసుపత్రిగా మార్చడంతో సాధారణ రోగులు, రోడ్డు ప్రమాద బాధితలకు వైద్యం అందడం లేదు. వారిని గుంటూరు ఆసుపత్రికి తరలించాలని చెబుతున్నారు. కొంతమంది స్థానికంగా ఉండే ప్రైవేటు ఆసుపత్రులను ఆశ్రయిస్తున్నారు. కొంతమంది తప్పనిసరిగా గుంటూరు వెళ్తున్నారు. ప్రస్తుతం కొవిడ్‌ ఉద్ధృతి తగ్గింది. సగం పడకలు ఖాళీ ఉన్నాయి. అవుట్‌ పేషంట్‌ విభాగం ఖాళీగా ఉంది. పడకల కోసం వచ్చే వారి సంఖ్య తగ్గింది. జిల్లాలో శనివారం 392 పాజిటివ్‌ కేసులు వచ్చాయి. విజయవాడ జీజీహెచ్‌తో పాటు బందరు జిల్లా ఆసుపత్రి ఖాళీగానే ఉంది. సాధారణ రోగులకు ఇక్కడ చికిత్స అందడం లేదు. కొన్ని పీహెచ్‌సీలు, ప్రాంతీయ ఆసుపత్రులు కొవిడ్‌ ఆసుపత్రులుగా మార్చారు. దీంతో ప్రస్తుతం అక్కడ కూడా చికిత్స అందడం లేదు. వెళితే ప్రైవేటు.. లేదంటే గుంటూరు అన్నట్లు పేదల పరిస్థితి తయారైంది.
పేదల పరిస్థితి..:విజయవాడలో జీజీహెచ్‌కు ఎంతో ప్రాధాన్యం ఉంది. ఇక్కడ మొత్తం 830 పడకలు ఉన్నాయి. సూపర్‌స్పెషాలిటీ బ్లాక్‌ ఉంది. జిల్లా ఆసుపత్రి బందరులో ఉంది. విజయవాడ బోధనాసుపత్రి కావడంతో పీజీ విద్యార్థులు వైద్య సేవలు అందిస్తుంటారు. జీజీహెచ్‌లో సాధారణ పరిస్థితుల్లో ఓపీకి రోజుకు 2వేల నుంచి 2,500 మంది రోగులు వస్తుంటారు. ఇన్‌పేషంట్లుగా సుమారు 600 మంది సగటున ఉంటారు. రోజుకు 15 మందికి పైగా డయాలసిస్‌ నిర్వహిస్తుంటారు. కొవిడ్‌ మొదటి దశలో ఇక్కడ ఉన్న రోగులను పక్కనే ఉన్న ఈఎస్‌ఐ ఆసుపత్రికి తరలించి అక్కడ చికిత్స అందించారు. అవుట్‌ పేషెంట్‌ విభాగాన్ని అక్కడే నిర్వహించారు. కొవిడ్‌ రెండో దశ ప్రారంభానికి ముందు జిల్లా ఆసుపత్రిలో ఇన్‌పేషెంట్లుగా వివిధ విభాగాల్లో ఉన్న వారిని క్రమేపీ డిశ్ఛార్జ్‌ చేశారు. మరికొందరికి శస్త్రచికిత్స వాయిదా వేశారు. ఇలా మొత్తం 500 మందిని పంపించేశారు. కొంత మంది క్లిష్ట పరిస్థితుల్లో ఉండేవారు. వీరిని కూడా డిశ్ఛార్జ్‌ చేసి మొత్తం కరోనా రోగులకు కేటాయించారు.
రెండో దశ తొలి రోజుల్లో జీజీహెచ్‌లో పడకలు లభ్యం కావడం కష్టంగా మారింది. పైరవీలు ఉంటేనే పడక లభించేది. సాధారణ రోగులను గుంటూరు పంపేవారు. తర్వాత అటు వైపు రోగులు రావడం మానేశారు. ఇటీవల కరోనా ఉద్ధృతి కొంత తగ్గింది. సగం పడకలు ఖాళీగా ఉన్నాయి. బ్లాక్‌ఫంగస్‌ కేసులు ఎక్కువయ్యాయి. ప్రస్తుతం సాధారణ రోగులు గుంటూరు వెళ్లాలంటే వ్యయప్రయాసాలు పడుతున్నారు. దీర్ఘకాలిక వ్యాధులతో బాధపడే వారు ప్రతి నెలా, లేదా రెండు నెలలకు ఒకసారి వస్తుంటారు. అలాంటి వారికి ప్రస్తుతం అవకాశం లేదు. కుక్కకాటు, పాముకాటు, విద్యుదాఘాతం, ఇతర సీరియస్‌ సమస్యలపై చికిత్స ఆశించి వచ్చే వారు ఎక్కడికి వెళ్లాలో తెలియని పరిస్థితి. కనీసం ఈఎస్‌ఐ ఆసుపత్రి అయినా ఓపీకి అవకాశమివ్వలేదు.