మాయగాడు..పోలీసులకు చిక్కినట్టే చిక్కి... చక్కగా చెక్కేశాడు

స్మగ్లింగ్​ కేసులో అరెస్ట్​ అయిన కానిస్టేబుల్​ను విజయవాడ నుంచి రాజమండ్రికి తరలిస్తుండగా పోలీసుల కళ్లు కప్పి పరారయ్యాడు.

ఇతనో క్రిమినల్​ పోలీస్​ కానిస్టేబుల్​... స్మగ్లింగ్​ చేస్తాడు... దొరికితే చట్టం కళ్లు కప్పి పరారవుతాడు. కానీ అవి ఎన్నాళ్లు సాగవు కదా.. గంజాయి స్మగ్లింగ్​ చేస్తూ పోలీసులకు దొరికిపోయాడు పడాల్​. విశాఖ జిల్లా చింతపల్లిలో కానిస్టేబులైన ఈయన ప్రస్తుతం సస్పెన్షన్​లో ఉన్నాడు. తాజాగా ఇతన్ని అరెస్ట్​ చేసిన గన్నవరం పోలీసులు కోర్టులో హాజరుపరిచి రాజమండ్రి జైలుకు తరలిస్తుండగా పరారయ్యాడు. ఈ విషయం ఆలస్యంగా వెలుగు చూసింది. ఈ కేసులో అతనితో పాటు మరో ఆరుగురికి 15 రోజులు రిమాండ్​ విధించారు. ఇతనికి సహకరించిన ముగ్గురు కానిస్టేబుళ్లను విజయవాడ నగర సీపీ ద్వారకా తిరుమల రావు సస్పెండ్​ చేశారు. పడాల్​ విశాఖ జిల్లా చింతపల్లి పోలీసు స్టేషన్​లో విధులు నిర్వహిస్తున్న సమయంలో స్టేషన్​ ఇన్​స్పెక్టర్​ తుపాకిని ఎత్తుకెళ్లాడు. ఇతనిపై అనేక కేసులు నమోదైనట్లు పోలీసులు తెలిపారు. నిందితుని కోసం రెండు బృందాలు ఏర్పాటు చేసినట్లు గన్నవరం పోలీసులు తెలిపారు.