పూల సాగు సన్నకారు రైతుల ముఖాల్లో నవ్వులు పూయించడంలేదు. కరోనా ప్రభావం నుంచి సాగుదారులు ఇంకా ఏ మాత్రం కోలుకోవడంలేదు. మార్కెట్లో పూల ధరలు వినియోగదారులకు ఒకింత భారంగా అనిపిస్తున్నా.. పండించిన రైతుకు మాత్రం ఆశించిన స్థాయిలో పెట్టుబడులు కూడా వచ్చే పరిస్థితిలో లేదు. ఈ ఏడాది ఏప్రిల్‌ నుంచి ఇప్పటివరకు ఏ పండుగ అయినా కళ అంతంత మాత్రంగానే ఉండడం.. వివాహాలు, ఇతర కార్యక్రమాల సందడి తగినంత లేకపోవడం.. అయ్యప్ప దీక్షలు, భవానీ దీక్షలు హడావుడి కూడా తక్కువగా ఉన్నందున పూల వినియోగం బాగా తగ్గిపోయింది. తోటల్లో పూలను మార్కెట్‌కు తీసుకెళ్లినా తగినంత ధర లేకపోవడంతో చాలా మంది రైతులు పొలాల్లో మొక్కలను దున్నేస్తూ ప్రత్యామ్నాయ పంటలు వేసుకుంటున్నారు. ఇంకొందరు కొన్ని వరుసల్లో మొక్కలను తొలగించి అంతర పంటలు వేసుకుని పూల నష్టాలను పూడ్చుకుంటున్నారు.
పరిమళించని మల్లెపూలు..
కృష్ణా జిల్లాలో పూలసాగు రైతులకు కన్నీటిని మిగులుస్తోంది. ఓవైపు వాతావరణం అనుకూలించక.. మరోవైపు ప్రభుత్వం ప్రోత్సాహం కానరాక.. ఇంకోవైపు కరోనా కష్టకాలం ఇంకా కొనసాగుతుండడంతో సాగుదారులు విలవిలలాడుతున్నారు. రోజురోజుకూ పడిపోతున్న పూల ధరలు వారిని మరింత ఆందోళనకు గురి చేస్తున్నాయి. గత కొన్నేళ్లతో పోలిస్తే కృష్ణాతీరంలో పూలసాగు ఇటీవల కాలంలో ఆశాజనకంగా పెరుగుతూ వస్తోంది. ఇప్పుడు ఆ పరిస్థితి కనుమరుగవుతోంది. ఇప్పుడు పూలసాగు అంటేనే భయపడే స్థితికి చేరుకుంటోంది.
శీతాకాలం ప్రారంభం నుంచి బంతి, చేమంతిలతో తోటలు ఎంతో రమణీయంగా కనిపిస్తుంటాయి. ఏడాదంతా పూసే కనకాంబరాలు, గులాబీలు సరేసరి. ఈ ఏడాది మార్చి తర్వాత కరోనా ప్రభావానికి మల్లె తోటల రైతులు మార్కెటింగ్‌ అవకాశాలు లేక డీలా పడ్డారు. ఇప్పుడు బంతి, చేమంతి సాగుదారుల పరిస్థితి అదే విధంగా మారింది. బెంగళూరు నుంచి తెప్పించి సాగు చేసిన హైబ్రీడ్‌ రకాలు వాతావరణం అనుకూలించక దిగుబడి రాక రైతులకు కలిసిరాలేదు. నిల్వ ఉండే గుణం కలిగిన పరిమళం వెదజల్లే సెంటెడ్‌ గులాబీకి వినియోగదారుల నుంచి ఎక్కువ గిరాకీ ఉండడంతో విజయవాడ నగర శివారు గోశాల, ఈడ్పుగల్లు తదితర ప్రాంతాల్లో ఈ రకాన్ని ఎక్కువగా సాగు చేస్తున్నారు. ఇప్పుడు ఇటీవల కురిసిన భారీ వర్షాలకు పూల తోటలు ఊహించని నష్టాన్ని ఎదుర్కొన్నాయి. నత్త ప్రభావం ఈ తోటలను ఆశించి నష్టపరుస్తోంది. తెగుళ్ల బెడద తప్పడంలేదు.